Capgemini компанияси томонидан тайёрланган World Wealth Report 2020 ҳисоботига биноан, 2019 йилда дунёда бойлиги 1 миллион доллар ва ундан кўп бўлган одамларнинг умумий сони 8,6 фоизга ошди. Бу ҳақда «РБК» хабар қилди.
Ўтган 2019 йилда доллар миллионерлари сонининг ўсиш суръати бўйича Шимолий Америка етакчига айланган. Бу ерда миллионерлар сони 10,9 фоизга ўсган.
Уларнинг умумий сони 2019 йилга келиб, 6,3 миллион кишини ташкил қилган. Бундай ўсиш суръати 2012 йилдан бери биринчи марта қайд этилмоқда.
Яқин Шарқ бу борада иккинчи ўринни эгаллаган. Унда бойлар сонининг ўсиш суръати 9,3 фоизни ташкил қилиб, жами 800 минг киши миллионер мақомини олган.
Европа минтақаси эса миллионерларнинг кўпайиши бўйича учинчи ўринни эгаллаган. Қитъада миллионерлар сони 8,7 фоизга ортиб, жами 5,2 миллион кишини ташкил қилган.
Шунингдек, 2019 йилда Шимолий Америкада доллар миллионерларининг умумий бойлиги 11 фоизга ўсган ва 21,7 триллион долларга етган.
Яқин Шарқ учун бу кўрсаткич 10,2 фоизни ташкил этиб, иккинчи ўринга кўтарилган.
2019 йилда активларнинг ортиши бўйича учинчи ўрин 7,9 фоиз ўсиш билан Осиё-Тинч океани минтақасига насиб этган.
Шу билан бирга, минтақа ҳали ҳам умумий бойлиги бўйича 22,2 триллион доллар билан дунёда пешқадам бўлиб турибди. Минтақа ушбу кўрсаткич бўйича 2016 йилдан бери пешқадамликни эгаллаб келмоқда.
Мавзуга доир:
- Alibaba асосчиси Жек Ма нефть нархининг пастлаши сабаб Осиёнинг энг бой одамига айланди
- Эски курсига ва пианинога яширинган хазиналар. Топиб олган нарсаси эвазига бойиб кетган одамлар ҳақида
- 25 ёшида миллионерга айланган Стив Жобс. Асрандилиги, ўқишни ташлаши мақсадга эришишига тўсқинлик қилмаган даҳо
Изоҳ (0)