Ер аҳолисининг сони 7,8 миллиардга етди. Бу ҳақда 10 июль куни Германиянинг «Ер аҳолиси» фонди (Stiftung Weltbevölkerung — DSW) хабар қилган.
Фонд хабарида Ер сайёрасида яшовчи аҳоли сони ҳар йили 82 миллион нафарга кўпаяётгани ва бу Германияда яшайдиган фуқаролар сонига тенг экани қайд этилган. Бутун дунёда ҳар сонияда ўртача 2,6 нафар чақалоқ туғилади.
DSW экспертлари аҳоли сонининг бундай юқори суръатларда кўпайишига айрим мамлакатларда, айниқса учинчи дунё давлатларида эрта ҳомиладорлик, эрта никоҳ ҳолатлари сабаб бўлаётганини қайд этган. Бутун дунёда ҳар бешта ҳомиладорликдан иккитаси аёл иродасига зид равишда юзага келиши айтилган. Экспертлар ушбу вазиятни аҳоли орасида тарғибот ишларини олиб бориш орқали бартараф этиш мумкин деб ҳисобламоқда.
DSW маълумотига кўра, Африка қитъасидаги мамлакатларда бу борадаги вазият анча оғир, хусусан Саҳройи Кабир атрофларида ҳар иккинчи аёл жинсий ҳимоя воситаларига эга эмас. Гарчи ушбу ҳудудда туғилишлар сони нисбатан камайган бўлса ҳам ҳар онага 4,4 нафардан бола (бутун дунёда бу кўрсаткич 2,4 чақалоқни ташкил қилади) тўғри келмоқда. Оқибатда БМТ прогнозлари бўйича 2050 йилга бориб минтақадаги аҳоли сони 1,3 миллиарддан 2,5 миллиардга етади.
2017 йил декабрь ойида Ер юзи аҳолиси 2018 йил 1 январда 7,4 миллиард кишига етиши, 2019 йил июнь ойида эса БМТнинг Ер юзи аҳолиси 2100 йилга келиб 10 миллиард кишидан ошиши мумкинлигини прогноз қилгани ҳақида хабар берилган.
Изоҳ (0)