Capgemini kompaniyasi tomonidan tayyorlangan World Wealth Report 2020 hisobotiga binoan, 2019-yilda dunyoda boyligi 1 million dollar va undan ko‘p bo‘lgan odamlarning umumiy soni 8,6 foizga oshdi. Bu haqda “RBK” xabar qildi.
O‘tgan 2019-yilda dollar millionerlari sonining o‘sish sur’ati bo‘yicha Shimoliy Amerika yetakchiga aylangan. Bu yerda millionerlar soni 10,9 foizga o‘sgan.
Ularning umumiy soni 2019-yilga kelib, 6,3 million kishini tashkil qilgan. Bunday o‘sish sur’ati 2012-yildan beri birinchi marta qayd etilmoqda.
Yaqin Sharq bu borada ikkinchi o‘rinni egallagan. Unda boylar sonining o‘sish sur’ati 9,3 foizni tashkil qilib, jami 800 ming kishi millioner maqomini olgan.
Yevropa mintaqasi esa millionerlarning ko‘payishi bo‘yicha uchinchi o‘rinni egallagan. Qit’ada millionerlar soni 8,7 foizga ortib, jami 5,2 million kishini tashkil qilgan.
Shuningdek, 2019-yilda Shimoliy Amerikada dollar millionerlarining umumiy boyligi 11 foizga o‘sgan va 21,7 trillion dollarga yetgan.
Yaqin Sharq uchun bu ko‘rsatkich 10,2 foizni tashkil etib, ikkinchi o‘ringa ko‘tarilgan.
2019-yilda aktivlarning ortishi bo‘yicha uchinchi o‘rin 7,9 foiz o‘sish bilan Osiyo-Tinch okeani mintaqasiga nasib etgan.
Shu bilan birga, mintaqa hali ham umumiy boyligi bo‘yicha 22,2 trillion dollar bilan dunyoda peshqadam bo‘lib turibdi. Mintaqa ushbu ko‘rsatkich bo‘yicha 2016-yildan beri peshqadamlikni egallab kelmoqda.
Mavzuga doir:
- Alibaba asoschisi Jek Ma neft narxining pastlashi sabab Osiyoning eng boy odamiga aylandi
- Eski kursiga va pianinoga yashiringan xazinalar. Topib olgan narsasi evaziga boyib ketgan odamlar haqida
- 25 yoshida millionerga aylangan Stiv Jobs. Asrandiligi, o‘qishni tashlashi maqsadga erishishiga to‘sqinlik qilmagan daho
Izoh (0)