29 июнь куни Туркманистон ва Ўзбекистон санъат ва маданият соҳаси вакилларининг онлайн учрашуви бўлиб ўтди.
Маданият вазирлиги ахборот хизматининг хабар беришича, учрашувда Туркманистон президенти Гурбангули Бердимуҳамедовнинг Ўзбекистон маданият вазири Озодбек Назарбековни Туркманистонда хизмат кўрсатган артист унвони билан тақдирлаш тўғрисидаги фармони эълон қилинди ва расмий тарзда масофадан топширилди.
Туркманистоннинг ушбу юксак унвони билан Озодбек Назарбеков икки мамлакат халқлари ўртасидаги дўстлик, қардошлик, қўшиқ ва мусиқа санъатини ривожлантиришдаги хизматлари учун тақдирланди.
Эслатиб ўтамиз, Озодбек Назарбеков Ўзбекистоннинг Биринчи Президенти Ислом Каримов даврида Ўзбекистонда хизмат кўрсатган артист, Ўзбекистон халқ артисти, Қорақалпоғистон халқ артисти унвонлари билан тақдирланган.
Озодбек Назарбеков Туркманистон давлат раҳбарига ўзининг чуқур миннатдорчилигини билдираркан, икки давлат ўртасидаги дўстлик ришталарини мустаҳкамлашда санъат ва маданиятнинг роли нечоғлик муҳим эканини таъкидлади:
«Икки давлат дўстлик алоқаларини мустаҳкамлаш учун камтарона қилган меҳнатимиз юқори даражада баҳоланганлиги учун ҳурматли Гурбангули Маликгулиевич, сизга, қардош туркман халқига чин кўнгилдан миннатдорчилик билдираман.
Ушбу фахрий унвон берилиши, халқларимиз ўртасида маданият соҳасидаги муносабатларни янада мустаҳкамлаш йўлида шижоат билан меҳнат қилишимизга куч беради», — деди Озодбек Назарбеков.
Шунингдек, Озодбек Назарбеков Гурбангули Бердимуҳамедовни 63 ёшга тўлгани муносабати билан табриклади.
Совға тариқасида Туркманистон халқ артисти Дилбар Раҳмонова билан биргаликда «Баригал» қўшиғи тақдим этилди, дейилади хабарда.
Изоҳ (0)