«Миллион» кулги жамоасининг коронавирус пандемияси туфайли 27 июнь—6 июлга кўчирилган концерти яна қолдирилди. Бу ҳақда жамоа етакчиси Даврон Кабулов маълум қилди.
«Миллион» жамоасининг концерт дастури Ўзбекистонда COVID-19 пандемияси карантини давом этиши муносабати билан номаълум муддатга (дастлабки тахминлар бўйича сентябрь октябрь ойларига) қолдирилади.Маданият вазирлиги ва «Ўзбекконцерт» мутасаддилари, «Халқлар дўстлиги» саройи раҳбарияти оммавий тадбирлар ўтказилишига рухсат берилиши билан биринчи навбатда баҳор фаслига белгиланган, чипталари сотиб бўлинган (Юлдуз Усмонова, Озода Нурсаидова, «Миллион», Алишер Файз ва бошқалар) концерт дастурлари ўтказилишини маълум қилишмоқда. Харид қилинган чипталар ўз кучида қолади.
Янги саналар Республика махсус комиссиясининг рухсати берилганидан сўнг ОАВ ва ижтимоий тармоқдаги саҳифаларимиз орқали эълон қилинади. Касса карантин ниҳоясига етиши билан ўз ишини давом эттиради: ўзгартирилган кунлар ноқулайлик туғдирган тақдирда томошабинлар пулларини қайтариб олиш имкониятига эга.
Ушбу чипталар яна касса орқали савдога чиқарилади. Бу эса баҳорги концертга чипта харид қилиш имконини топа олмаган юртдошларимиз учун «Миллион» дастурини жонли кўришга яна бир қўшимча имконият тақдим этади.
Қолаверса, жамоамиз ишқибозлари ичида ёшлар кўпчиликни ташкил этиши инобатга олинса, талабаларнинг Тошкентга қайтишлари учун ҳам шароит юзага келади. Баъзи сайтлар орқали тарқатилган карантингача ўтиши керак бўлган концертлар бекор қилинади, мазмунидаги хабарлар асоссиз.
Биз, албатта, қайтамиз. Юракларни эзган карантиннинг ғуборларини ёзиш учун ҳам, яхши кайфият нималигини энг садоқатли томошабинимизга эслатиш учун ҳам қайтамиз. Олиб чиқадиган мавзуларимиз, сезиб турганингиздек, кундан кунга кўпайиб бормоқда. Кўришгунча!
Даврон Кабулов, «Миллион» кулги жамоаси сардори
Изоҳ (0)