Теҳрон аэропорти яқинида қулаган Украина йўловчи самолёти Эрон ҳаво мудофаа тизимининг нотўғри конфигурацияси туфайли уриб туширилган. Бу ҳақда Эрон фуқаро авиацияси ташкилотининг воқеани тергов қилиш жараёни ҳақидаги ҳисоботида айтилган, дея хабар беради «РБК».
Ҳисоботга кўра, Теҳроннинг ҳаво мудофааси тизимларидан бири ишдан чиққан, бу унинг жуғрофий жойлашуви ва йўналиши ўзгаришига олиб келган. Бундан ташқари, тизим бошқа ерга кўчириб ўтилгандан сўнг, конфигурация амалга оширилмаган.
Нотўғри созламалар туфайли тизим самолётни жануби-ғарбий томондан Теҳрон томон ҳаракатланаётган объект сифатида нотўғри хулосага келган. Аслида лайнер Эрон пойтахтидан учиб кетаётган бўлган.
Маълумот учун, Эрон ислом инқилоби муҳофизлари корпуси (IIMK)нинг «Ал-Қудс» махсус бўлинмаси генерали Қосим Сулаймоний 3 январь куни АҚШ ҳаво кучлари томонидан Бағдод аэропортига берилган авиаҳужум оқибатида ўлдирилганди. Зарба АҚШ президенти Дональд Трамп фармойишига асосан берилган. 8 январь куни эса Эрон унга жавобан Ироқдаги Америка базасига ҳужум қилган.
Мавзуга доир: Эрон Қосим Сулаймонийнинг ўлими учун Трампни қамоққа олиш ҳақида ордер берди ва Интерполга мурожаат қилди
Эрон дарҳол авиаҳалокатга техник носозлик сабаб бўлганини айтган. Кейинчалик, 11 январь куни Эрон мамлакат ҳаво мудофааси самолётни операторнинг хатоси туфайли уриб тушурилганини тан олди. Январь ойи охирида Эрон ташқи ишлар вазири Муҳаммад Жавод Зариф самолётни тасодифан уриб тушурган аскар қамоқда эканини айтган.
Изоҳ (0)