Қашқадарё ҳокими Зоир Мирзаев вилоятдаги мавжуд туман ва шаҳар ҳокимликларининг ахборот хизмати раҳбарларини фаолликка чақирди. Бу ҳақда вилоят ҳокимининг қашқадарёликларга қилган мурожаатида таъкидланди, дея хабар берди «Дарё» мухбири.

Фото: Қашқадарё вилоят ҳокимлиги

Мурожаатда вилоят ҳокими кучайтирилган карантин пайтида туман ва шаҳар ҳокимликлари ахборот хизмати раҳбарлари ҳар доимгидан ҳам фаоллашиши зарурлигини таъкидлаган.

«Ахборот хизмати раҳбарларининг уч-тўрт нафари фаол, қолганлари ҳам уйғониши керак. Тарқатилаётган танқидий руҳдаги ёки ёлғон хабарларга вазият бўйича матбуот котиблари ўз вақтида муносабат билдириши, муаммони барвақт ўрганиб жамоатчиликка етказиши зарур», — деган вилоят ҳокими.

Таъкидлаш лозим, Қашқадарёда айни кунда 15 та туман ва шаҳар ҳокимликларининг ахборот хизмати раҳбарлари фаолият юритади.

Қашқадарё ҳокими ахборот хизмати раҳбарлари хусусида гапира туриб, аксарият ахборот хизмати раҳбарлари ҳатто ҳудудидаги соҳалар кесимида қилинган ишларни ҳам етарли даражада ёритмаётганини таъкидлаган.

«Ҳудудингизда соҳалар кесимида ёритилиши керак бўлган қанчадан қанча янгиликлар бор. Кўпчилик ахборот хизмати раҳбарлари уйғониши керак. Президентимиз қарорида белгиланган мақсад ва вазифаларингизни унутиб қўйманг», — дея ахборот хизмати раҳбарларига талаб қўйган вилоят ҳокими.

Аҳрор Содиқов. Қашқадарё вилоят ҳокимлиги ахборот хизмати раҳбари.

Фото: Қашқадарё вилоят ҳокимлиги

Қашқадарё ҳокими Зоир Мирзаев ҳокимликларнинг ахборот хизмати раҳбарлари фаолиятини доимий кузатиб боришини илгари ҳам ошкор қилганди.

Ўшанда вилоятдаги 8 та туман ҳокимларининг матбуот котиблари фаолиятини танқид қилган ҳоким Чироқчи, Муборак, Миришкор, Қамаши, Китоб, Шаҳрисабз, Ғузор ва Қарши туман ҳокимларининг матбуот котиблари ҳудудда соҳалар бўйича амалга оширилаётган ишларни ёритишда ОАВлар билан самарали ҳамкорликни йўлга қўймаганини айтиб ўтганди.