«Akfa университетининг моддий-техник базасини мустаҳкамлаш бўйича қўшимча чора-тадбирлар тўғрисида»ги қарор лойиҳаси муҳокамага қўйилгани ҳақида хабар берилганди. «Kun.uz»нинг маълум қилишича, ушбу қарор лойиҳаси келишиш учун Давлат активларини бошқариш агентлигига юборилмаган.
«Соғлиқни сақлаш вазирлиги томонидан Норматив-ҳуқуқий ҳужжатлар лойиҳалари муҳокамаси порталига қўйилган ‘Akfa университетининг моддий-техник базасини мустаҳкамлаш бўйича қўшимча чора-тадбирлар тўғрисида’ги президент қарори лойиҳаси келишиш учун агентлигимизга юборилмаган. Regulation.gov.uz’да ҳам ҳужжат лойиҳасини тайёрлаган ва кўриб чиққан вазирлик ва идоралар рўйхатида ҳам агентлигимиз номи келтирилмаган.
Давактив фойдаланиш учун бериладиган ҳар қандай объектлар ва ер майдонлари очиқ, шаффоф тендер асосида сотилиши тарафдоридир», — деган агентлик директорининг матбуот котиби Мўмин Ибодов.
Агентлик Akfa университетига ажратилиши кўзда тутилган Қибрай туманида жойлашган, Тошкент шаҳар ҳокимлигига қарашли «Манзарали боғдорчилик ва гулчилик» МЧЖ балансида бўлган 29,48 га ер майдонини доимий фойдаланишга ажратиб бериш масаласи бўйича ҳам муносабат билдирган.
Таъкидланишича, мазкур масала «Масъулияти чекланган ва қўшимча масъулиятли жамиятлар тўғрисида»ги қонунга мувофиқ мазкур жамиятнинг тегишли бошқарув органлари томонидан кўриб чиқилиши лозим, яъни боғни кўчириш учун МЧЖнинг розилигини олиш тавсия этилади.
Маълумот учун, Давлат активларини бошқариш агентлигининг хусусийлаштириш дастурига мувофиқ «Манзарали боғдорчилик ва гулчилик» МЧЖ мол-мулки 100 фоиз сотувга қўйилиши режалаштирилган.
Аввалроқ Монополияга қарши курашиш қўмитаси Ўзбекистонда қатор корхоналарга эксклюзив имтиёзлар бериш ҳуқуқини бекор қилишни кўзда тутувчи Президент фармони лойиҳасини муҳокамага қўйганди. Фармон лойиҳасида Akfa университетига берилган солиқ ва божхона имтиёзларини бекор қилиш кўзда тутилган.
Изоҳ (0)