Бандлик ва меҳнат муносабатлари вазирлигида «Аҳолини иш билан таъминлаш тўғрисида»ги қонуннинг янги таҳрири муҳокама қилинди. Унда Олий Мажлис Сенати қўмиталари аъзолари ва вазирлик вакиллари иштирок этди, дея хабар бермоқда «Дарё» мухбири.
Таъкидланишича, 1998 йилда қабул қилинган амалдаги «Аҳолини иш билан таъминлаш тўғрисида»ги қонун бугунги меҳнат бозорининг кўплаб талабларига мос келмайди. Аввало, у тадбиркорликни рағбатлантириш, ўзини ўзи банд қилиш, ишсизларни касб-ҳунарга ўқитиш ва ахборот тизимларидан самарали фойдаланишни ўзида акс эттирмайди. Шу билан бирга ҳозирги меҳнат бозори ва бандлик соҳасидаги мавжуд муаммоларни тизимли ҳал қилишга ҳуқуқий имкон яратмайди.
Сенатнинг Бюджет ва иқтисодий ислоҳотлар масалалари қўмитаси раиси Эркин Гадоевнинг сўзларига кўра, янги қонун лойиҳасида амалдаги ҳужжатда ишламаган меъёрлар чиқариб ташланган ва уларнинг ўрнига янгилари жорий этилмоқда.
«Мазкур қонун бугунги замон талабига жавоб берадиган даражада ишлаб чиқилганлиги боис унинг номи ҳам, мазмуни ҳам бутунлай ўзгартирилди. Халқаро нуқтаи назардан келиб чиқиб, эскирган терминларни ҳам янгисига алмаштирдик.
Асосий янгиликлардан яна бири — қонуннинг тўғридан-тўғри амал қилиш принципи жорий этиляпти. Чунки амалдаги қонун ҳажман жуда кичкина эди ва асосий масалалар қонуности ҳужжатлар билан тартибга солинарди. Қонуности ҳужжатлар ижро этувчи органлар — вазирлик ва идоралар учунгина қабул қилинади. Аслида қонун барча учун баробар ва очиқ-ошкора бўлиши лозим. Аввалги қонунда ишламаган меъёрлар чиқариб ташланиб, ўрнига янгилари жорий қилиняпти ва тўғридан-тўғри ишлаш тартиби йўлга қўйилмоқда.
Шунингдек, янги қонунда ўзини ўзи банд қилган аҳолини солиқ ва имтиёзлар билан қўллаб-қувватлаш кучайтирилмоқда. Энди ўзини ўзи банд қилган аҳоли онлайн тарзда солиқ идораларини хабардор қилиб фаолиятини давом эттиравериши мумкин. Бу каби фаолият турлари ҳозир 67 та ва у яна кенгайиши кутиляпти. Навбатдаги муҳим жиҳати — ўзини ўзи банд қилган аҳолига иш стажи ёзиб борилади», — деди сенатор.
Гадоевнинг қўшимча қилишича, 22 йил аввал қабул қилинган қонун 35 моддадан иборат, янги қонун эса 129 моддани ўз ичига олади. «Аҳоли бандлиги тўғрисида»ги қонун лойиҳасига учта қонун, Ўзбекистон Президентининг 12 та фармон ва қарори ҳамда Вазирлар Маҳкамасининг бандлик, меҳнат бозорини тартибга солиш, меҳнат миграциясига тааллуқли 41 та меъёрий ҳужжати киритилган.
Амалдаги қонунда ишсизлик нафақалари энг кам иш ҳақидан иборат бўлса, янги қонунда эса меҳнатга ҳақ тўлашнинг энг кам миқдоридан бошланмоқда. Бу ҳозирги вақтда 634 880 сўмдан кўпроқни ташкил этади.
Сенатор Робахон Маҳмудова қонун лойиҳасидаги айрим янгиликларга тўхталаркан, қонунда бандликни рағбатлантириш ва тадбиркорликка жалб этиш учун субсидия ажратишдан ташқари қуйидагиларга грантлар бериш ҳам назарда тутилаётганини таъкидлаб ўтди:
- касбга ўқитиш марказлари ва касб-ҳунар таълими муассасаларига — иш қидираётган шахсларни ва ишсиз шахсларни, айниқса, меҳнат миграциясидан қайтиб келган фуқароларни, кам таъминланган оилалардан бўлган хотин-қизларни касбга тайёрлаш харажатларини молиялаштириш учун;
- касбга ўқитиш марказлари ва касб-ҳунар таълими муассасаларида фермер хўжаликларининг раҳбарлари ва ходимларини, деҳқон хўжаликларининг раҳбарлари ва аъзоларини, томорқа ер участкалари эгаларини агротехнологиялар, боғдорчилик, сабзавотчилик, чорвачилик, паррандачилик, балиқчилик ва асаларичилик соҳасида касбга қайта тайёрлаш ҳамда уларнинг малакасини оширишни молиялаштириш учун.
Изоҳ (0)