Қозоғистонда қўлбола алкогол маҳсулотини ичган 15 киши заҳарланиб вафот этди. Бу ҳақда мамлакат ИИВ матбуот хизматига таяниб, Tengrinews хабар берди.
Қозоғистоннинг иккита минтақасида инсонларнинг ўлими факти бўйича судгача бўлган тергов ишлари бошлаб юборилган.
Костанай вилоятидаги Аркалик шаҳрида 3—4 июль кунлари этанолнинг токсик таъсири ташхиси билан 13 киши жонлантириш бўлимига ётқизилган. Кейинроқ уларнинг 11 нафари вафот этган.
Бу давр оралиғида Ақмўла вилоятидаги посёлкаларидан бирида яна 4 киши вафот этган.
«Дастлабки тахминларга кўра, фуқароларнинг ўлимига — умумий интоксикация туфайли ўткир геморрагик панкреатит сабаб бўлган. Вафот этганлар 5 литрли пластик идишларга қуйилган алкогол маҳсулотидан заҳарлангани аниқланди», — дейилади ИИВ хабарида.
Таъкидланишича, 4 июль куни Ақмўла вилоятида ўтказилган тергов ишлари давомида спиртли ичимликларни қуйиб сотиш билан шуғулланувчи цех аниқланган. Полициячилар уч нафар гумонланувчини қўлга олган, сотиш учун тайёрлаб қўйилган маҳсулотларнинг бир қисми мусодара қилинган. Бироқ гумонланувчилар спиртли ичимликларнинг катта қисмини сотишга улгурган, бу эса кўплаб инсонлар соғлиғига жиддий хавф туғдиради.
Шу муносабат билан Қозоғистон Ички ишлар вазирлиги фуқароларни эҳтиёткор бўлишга ва шубҳали ишлаб чиқарувчиларнинг алкогол маҳсулотларини харид қилмасликка чақиради.
Аввалроқ Туркияда қалбаки алкогол маҳсулотидан заҳарланиб ўлган туркманистонликлар сони 37 нафарга етгани тўғрисида хабар берилганди.
Эслатиб ўтамиз, Ўзбекистонда 2020 йилнинг февралида Амударё туманида қўлбола алкогол маҳсулотини муомалага киритмоқчи бўлган шахс қўлга олинган эди.
Изоҳ (0)