Халқаро миграция ташкилоти (ХМТ), ЮНИСЕФ ва Тожикистон ҳукумати биргаликда Қозоғистон ва Ўзбекистон чегараларида қолган тожик муҳожирларининг уйларига қайтишига кўмак берди, деб хабар беради Asia-Plus.
«Жибек йўли» қозоқ-ўзбек чегара постида 3 июль куни пандемия сабаб қолиб кетган 776 тожикистонлик фуқаро, шу жумладан, 40 нафардан ошиқ болалар автобус орқали уйларига қайтарилди.
Мавзуга доир: Самарадаги 350 нафардан ортиқ ўзбекистонлик Қозоғистон орқали ортга қайтаётгани маълум қилинди
«Жибек йўли» чегара постида 23 июнь куни юзлаб тожикистонликлар ХМТ кўмаги билан 14 та автобусда Ўзбекистон орқали Суғд вилоятига олиб келинган.
Ўз ватанига қайтган барча тожикистонлик карантинга олинган. Қозоғистон—Ўзбекистон чегарасидан қайтарилган тожикистонликларнинг олдинги гуруҳи орасида 50 дан ошиқ асемптоматик (аломатсиз) коронавирус аниқланган.
Эслатиб ўтамиз, Тожикистонда коронавирус билан касалланганлар сони 6 108 кишига етди. Ўтган сутка давомида яна 50 кишида коронавирус аниқланган.
Мамлакатда ўтган бир сутка ичида 72 кишига шифохонадан жавоб берилган. Тожикистонда ҳозирга қадар 52 киши COVID-19 қурбонига айланган, 4762 бемор даволанган. Айни вақтда 216 нафар бемор шифохоналарда қолмоқда.
Изоҳ (0)