Qozog‘istonda qo‘lbola alkogol mahsulotini ichgan 15 kishi zaharlanib vafot etdi. Bu haqda mamlakat IIV matbuot xizmatiga tayanib, Tengrinews xabar berdi.
Qozog‘istonning ikkita mintaqasida insonlarning o‘limi fakti bo‘yicha sudgacha bo‘lgan tergov ishlari boshlab yuborilgan.
Kostanay viloyatidagi Arkalik shahrida 3—4-iyul kunlari etanolning toksik ta’siri tashxisi bilan 13 kishi jonlantirish bo‘limiga yotqizilgan. Keyinroq ularning 11 nafari vafot etgan.
Bu davr oralig‘ida Aqmo‘la viloyatidagi posyolkalaridan birida yana 4 kishi vafot etgan.
“Dastlabki taxminlarga ko‘ra, fuqarolarning o‘limiga — umumiy intoksikatsiya tufayli o‘tkir gemorragik pankreatit sabab bo‘lgan. Vafot etganlar 5 litrli plastik idishlarga quyilgan alkogol mahsulotidan zaharlangani aniqlandi”, — deyiladi IIV xabarida.
Ta’kidlanishicha, 4-iyul kuni Aqmo‘la viloyatida o‘tkazilgan tergov ishlari davomida spirtli ichimliklarni quyib sotish bilan shug‘ullanuvchi sex aniqlangan. Politsiyachilar uch nafar gumonlanuvchini qo‘lga olgan, sotish uchun tayyorlab qo‘yilgan mahsulotlarning bir qismi musodara qilingan. Biroq gumonlanuvchilar spirtli ichimliklarning katta qismini sotishga ulgurgan, bu esa ko‘plab insonlar sog‘lig‘iga jiddiy xavf tug‘diradi.
Shu munosabat bilan Qozog‘iston Ichki ishlar vazirligi fuqarolarni ehtiyotkor bo‘lishga va shubhali ishlab chiqaruvchilarning alkogol mahsulotlarini xarid qilmaslikka chaqiradi.
Avvalroq Turkiyada qalbaki alkogol mahsulotidan zaharlanib o‘lgan turkmanistonliklar soni 37 nafarga yetgani to‘g‘risida xabar berilgandi.
Eslatib o‘tamiz, O‘zbekistonda 2020-yilning fevralida Amudaryo tumanida qo‘lbola alkogol mahsulotini muomalaga kiritmoqchi bo‘lgan shaxs qo‘lga olingan edi.
Izoh (0)