Тошкент шаҳар Миробод туманида жойлашган омборхона мудири саккиз ой давомида ўз шериги билан 116,8 миллион сўмлик маҳсулотларни ўғирлаб сотгани фош этилди. Бу ҳақда Тергов департаменти хабар берди.
Миробод тумани Янги замон кўчасида жойлашган корхонага қарашли омборхона мудири, 39 ёшли Х.Р. корхона омборидан 2019 йил 1 октябрь кунидан 2020 йилнинг 1 июнь кунига қадар рангли металл — латундан ишлаб чиқарилган, жами баҳоси 116,8 миллион сўмлик 14 турдаги маҳсулотни давомий равишда ўғирлаб сотиб, пулларни ўз эҳтиёжига сарфлаган.
Мазкур ҳолат юзасидан Миробод тумани ИИБ ҳузуридаги Тергов бўлими томонидан Х.Р.га нисбатан жиноят иши қўзғатилган. Дастлабки тергов давомида Х.Р. Жиноят кодексининг 167-моддаси 3-қисми «а» бандида (Жуда кўп миқдорда ўзлаштириш ёки растрата йўли билан талон-торож қилиш) кўрсатилган жиноятни содир этганликда гумон қилинувчи тариқасида жалб қилинган.
Дастлабки тергов давомида мазкур жиноятга 34 ёшли С.Я. ҳам алоқадорлиги аниқланиб, у ҳам гумон қилинувчи тариқасида жалб қилинган.
Жиноят иши бўйича жами зарарнинг 90 миллион сўми қопланган. Ҳозирги кунда жиноят иши бўйича дастлабки тергов ҳаракатлари давом этмоқда.
Мавзуга доир:
- Тошкент вилоятида 45 нафар фуқаронинг 150 млн сўм пулини талон-торож қилган шахс 5 йилга озодликдан маҳрум қилинди
- Тошкентдаги хонадондан 60 млн сўмлик тилла тақинчоқлар, 150 доллар ва 150 минг сўм ўғирлаганлар қўлга тушди
- Халқ банкининг Фарғонадаги филиали пул омборидан 100 минг доллар ўғирлаган жиноий гуруҳга суд ҳукми ўқилди
Изоҳ (0)