Саудия Арабистони коронавирус билан касалланганлар сони бўйича араб давлатлари орасида рекордларни янгилашда давом этмоқда. 3 июль куни бу кўрсаткич 200 минг кишидан ошиб кетди, деб хабар бермоқда мамлакат Соғлиқни сақлаш вазирлиги Twitter’даги саҳифасида.
«Сўнгги суткада 4 мингдан ортиқ касалланиш ҳолатлари аниқланганидан сўнг Саудия Арабистонида COVID-19 тарқалиши бошланганидан бери касалланганларнинг умумий сони 201,8 мингни ташкил этмоқда», — дейилади вазирлик хабарида.
Шу билан бирга, умумий ҳисобда беморларнинг 140 нафари соғайган, 1,8 минг нафари коронавирус асоратларидан вафот этган.
Коронавирусга чалинганлар сони доимий равишда ортиб бораётганига қарамай, Саудия Арабистони ички авиқатновлар ва вилоятлараро ҳаракатланишга рухсат бериб, май ойининг охирида аста-секин чеклов чораларини юмшата бошлади.
Мамлакат масжидлари яна ишлай бошлади. Бироқ Саудия Арабистони хорижлик зиёратчилар учун 2020 йилги Ҳаж зиёратини бекор қилди. Фақат мамлакатда бўлиб турган мусулмонларгина Ҳаж зиёратини адо этиши мумкин. Бу йил уларнинг сони ўн мингдан ошмайди, одатда Ҳажга келувчилар сони бир неча миллион кишини ташкил қиларди.
Аввалроқ Саудия Арабистонида 23 мартдан бошлаб жорий этилган комендантлик соати 21 июнь куни бекор қилингани хабар берилган эди. Аммо шунга қарамай, кўплаб чекловлар ўз кучида қолди. Ҳукумат хорижга саёҳат қилиш ва зиёратларга қўйилган тақиқларни ўз кучида қолдирган.
Изоҳ (0)