Хитойда сўнгги суткада коронавирус билан касалланиш бўйича 3 та ва касаллик белгисиз ўтаётган 4 та ҳолат аниқланди, беморларнинг 10 нафари соғайди, вафот этиш ҳолатлари қайд этилмади. Бу ҳақда Хитой Соғлиқни сақлаш миллий комиссиясининг маълумотига таяниб, «РИА Новости» хабар берди.
Қайд этилишича, аниқланган 3 та ҳолатнинг 1 таси мамлакатнинг ўзида, Пекин шаҳрида, қолган 2 таси четдан юқтирилган.
Мамлакатда умумий ҳисобда 83 545 киши коронавирусга чалинган, уларнинг 78 509 нафари соғайган, 4634 нафар бемор COVID-19 қурбонига айланган. Касалхонада 402 киши даволанишда қолмоқда.
Шунингдек, Хитойда касаллик белгисиз ўтаётган 4 та ҳолат аниқланган. Шундай кишиларнинг яна 98 нафари кузатувда бўлиб турибди.
Жанубий Кореяда Жонс Ҳопкинс университети маълумотларига кўра, сутка давомида 63 киши коронавирусга чалингани қайд этилиб, касалланганларнинг умумий сони 13 030 нафарга етди.
Сутка давомида 52 киши соғайиб, тузалганларнинг умумий сони 11 811 нафарга етди. Касаллик қурбонлари сони 283 нафарни ташкил этмоқда.
KCDC маълумотларига кўра, Жанубий Корея 1 июлдан бошлаб ремдесивир дори воситасини сотиб олишни бошлади. Ремдесивир Европа Иттифоқида рухсат олиш учун тавсия қилинган коронавирусга қарши илк дори воситаси ҳисобланади. Бу дори воситаси оғир аҳволдаги беморларни даволашда қўлланилади.
Қайд этилишича, 7 июлга қадар касалхоналар ремдесивир билан бепул таъминланади, 8 июлдан бошлаб эса унинг нархи муҳокама қилинади.
Изоҳ (0)