Туркия олий суди Истанбулдаги Авлиё София ибодатхонасининг мақоми президент фармони билан ўзгартирилиши мумкинлигига оид қарорни қабул қилди, деб хабар қилмоқда Грециянинг Оrthodox Times нашри.
Судьяларнинг фикрича, Туркиянинг биринчи президенти Мустафо Камол Отатурк 1934 йилда имзолаган ибодатхонага музей мақомини бериш ҳақидаги фармон ўз кучида қолади, бироқ ҳозирги давлат раҳбари Ражаб Тоййиб Эрдўғон ушбу мақомни сақлаб қолиш ёки ўзгартириш ҳақида қарор чиқаришга ҳақли деб белгиланган.
Бундан ташқари, ибодатхона масаласи Туркия Давлат кенгашида ҳам муҳокама қилинган. Бу борадаги эшитув 17 дақиқа давом этган, деб ёзмоқда CNN. Кенгашнинг расмий қарори 15 кун ичида эълон қилиниши мумкин.
Туркия ОАВнинг тахминларига кўра, Софиядаги биринчи мусулмонлар хизмати 15 июлда 2016 йилдаги ҳарбий-сиёсий давлат тўнтариши амалга ошмай қолганининг тўрт йиллиги муносабати билан фаолиятини бошлаши кутилмоқда.
Истанбулдаги Авлиё София ибодатхонаси борасидаги баҳс-мунозаралар 29 майда Константинопол қулашига 567 йил тўлиши муносабати билан бинода Қуръон хатм қилинганидан кейин яна авжига чиқди. Орадан бир ҳафта ўтгач, Туркия президенти Ражаб Тоййиб Эрдўғон ибодатхона масжидга айлантириш масаласини кўриб чиқишни буюрди. Кейинроқ Адлия вазири Абдулҳамид Гул ибодатхонанинг масжидга айлантириш тарафдори эканини айтди, ташқи ишлар вазири Мавлуд Чавушўғли ҳам ушбу ташаббусни қўллаб-қувватлаган.
Ўз навбатида Туркиянинг арман партриархи Саак II Авлиё София ибодатхонасининг мусулмонлар учун ҳам, христианлар учун ҳам тавба-тазарру жойи бўлиб қолиши кераклигини таъкидлади. Ибодатхонанинг масжидга айлантирилишига проваслав черковлари, юқори мартабали дипломатлар, жумладан, АҚШ давлат котиби Майкл Помпео қарши чиққан.
Авлиё София ибодатхонаси 1985 йилда ЮНЕСКОнинг бутунжаҳон мероси объектлари рўйхатига киритилган.
Изоҳ (0)