Канада чет элликларнинг мамлакатга кириш тақиқини камида 31 июлгача узайтирди, деб хабар бермоқда «РИА Новости» Канада чегара хизмати агентлиги вакили Ребекка Пурдининг баёнотига таяниб.
Унинг билдиришича, чет элликларнинг Канадага кириш тақиқи «жамоат соғлиғини сақлаш нуқтаи назаридан» камида 31 июлгача узайтирилди. Қайд этилишича, бундай тақиқ дастлаб 16 март куни, коронавирус инфекцияси тарқалишига қарши кураш доирасида жорий этилган.
Тақиқ дипломатлар, чет эллик талабалар, мавсумий ишчиларнинг айрим тоифалари ва Канада фуқароларининг яқин қариндошларига нисбатан қўлланилмайди.
Шунингдек, Канада ҳукумати мамлакатга кирувчилар учун ўз-ўзини изоляция қилиш тартибини 31 августгача узайтирмоқда. Карантин тартибини бузганлар 750 минг Канада доллари (551,5 АҚШ доллари) миқдорида жарима ёки 6 ойлик қамоқ жазосига ҳукм қилиниши мумкин. Агар карантин тартибини бузганлик бошқа бир кишининг ҳаётига хавф солса, жарима миқдори 1 миллион Канада доллари (735,4 минг АҚШ доллари)гача ошиши, қамоқ жазоси эса 3 йилгача узайтирилиши мумкин.
Сўнгги маълумотларга кўра, Канадада COVID-19 билан касалланганлар сони 103 918 кишига етди. Беморларнинг 67 178 нафари соғайди, 8 566 нафари вафот этди.
Аввалроқ Европа Иттифоқи ўз ҳудудига АҚШ, Бразилия ва Россиядан кириш тақиқини сақлаб қолмоқчи эканлиги хабар берилган эди. Дональд Трамп 2020 йил баҳорида Европа Иттифоқи мамлакатларига Қўшма Штатларга киришни тақиқлаган эди. Европа мамлакатлари эпидемияни назоратга олишга эришганига қарамай, АҚШ томони ушбу тақиқни ҳали ҳам бекор қилмаган.
Изоҳ (0)