Britaniyaning Pensions & Investment Research Consultants (PIRC) kompaniyasi Tesla aksiyadorlariga kompaniya asoschisi va bosh direktori Ilon Maskni direktorlar kengashidan chiqarib yuborishni maslahat berdi. Bu haqda PIRC hisobotiga tayanib, The Guardian xabar berdi.
Konsultantlarning o‘z pozitsiyasini Maskning 2018-yilda Tesla’ni asosiy aksiyadorlari bilan amalga oshirgan bitimi orqali tushuntirib bergan. 10 yilga mo‘ljallangan bitimga ko‘ra, Maskning mukofot pullari Tesla’ning moliyaviy maqsadlariga bog‘langan. Kompaniyaning bozordagi qiymati 650 milliard dollarga yetsa (kelishuv amalga oshirilgan vaqtda u 50 milliard dollar turgan), Mask umumiy hisobda 55,8 milliard dollar ishlab olishi mumkin bo‘lgan.
PIRC’ning xulosasi bo‘yicha, ushbu bitim Maskni “noqonuniy ravishda boyitadi”. Konsultantlar Ilon Maskni nafaqat Tesla direktorlar kengashidan chiqarib yuborish, balki bitimni bekor qilishni ham tavsiya etgan.
Bundan tashqari, PIRC’ning hisoblashicha, Mask o‘zining tvitlari orqali Tesla va uning aksiyadorlari obro‘siga jiddiy xavf tug‘diradi. Xususan, hisobotda biznesmenning Tesla aksiyalarini sotib olish va koronavirus borasidagi pozitsiyasi misol qilib keltirilgan.
Tesla aksiyadorlarining yig‘ilishi 7-iyul kuni bo‘lib o‘tishi rejalashtirilgan edi, biroq u sentabrga qadar qoldirilgan.
Eslatib o‘tamiz, Ilon Mask Twitter’dagi sahifasida 2018-yilning avgust oyida Tesla aksiyalarini bir donasini birjadan 420 dollardan sotib olishga tayyorligini bildirgan. AQSh qimmatli qog‘ozlar va birja bo‘yicha komissiyasi Ilon Mask investorlar bilan Tesla aksiyalarini sotib olish rejalarini muhokama qilmaganligini, u o‘zining tviti bilan bozor ishtirokchilarini atay yanglish fikrga borishga majbur qilganini bildirgan.
Hukumat o‘rtasidagi nizoga barham berish maqsadida Mask 20 million dollar to‘lagan va Tesla direktorlar kengashi rahbari lavozimini tark etgan (u kompaniya bosh direktori vazifasida qolgan).
Izoh (0)