Ўзбекистонда 2020/2021-ўқув йили учун умумтаълим мактабларининг 1-синфига ўқувчиларни қабул қилиш жараёни 6 июлдан бошланади. Бу ҳақда Халқ таълими вазирлиги хабар берди.
Маълум қилинишича, 1-синфга ўқувчиларнинг ҳужжатларини қабул қилиш пандемия шароитини инобатга олган ҳолда
- 6—31 июль кунлари бириктирилган микроҳудуд доирасида;
- 1—25 август кунлари мактабларнинг имкониятидан келиб чиқиб микроҳудуддан ташқарида амалга оширилади.
Шунингдек, пандемия шароитида ота-оналарнинг мактабларда тўпланиб қолишининг олдини олиш мақсадида Тошкент шаҳрида 1-синфга борадиган ўқувчиларнинг ҳужжат топшириш жараёни 5 июлдан «qabul.maktab.uz» сайти орқали тажриба-синов тариқасида онлайн навбат асосида амалга оширилади. Дастур Тошкент шаҳрида муваффақиятли синовдан ўтса, кейинги ўқув йилидан бошлаб бошқа ҳудудларда ҳам босқичма-босқич жорий қилинади.
Вазирликнинг маълум қилишича, 1-синфга қабул учун қуйидаги ҳужжатлар талаб этилади:
- мактаб директори номига ариза;
- боланинг туғилганлик ҳақидаги гувоҳномаси нусхаси;
- ота-онанинг паспорт нусхалари;
- боланинг соғлиғи тўғрисида тиббий маълумотнома;
- боланинг 3,5 х 4,5 сантиметр ўлчамдаги 4 дона рангли фотосурати.
Болаларни умумтаълим мактабларининг 1-синфига қабул қилиш билан боғлиқ саволлар, таклиф ва шикоятлар юзасидан туман (шаҳар) халқ таълими бўлимларига мурожаат этиш мумкин.
«Ота-оналардан мактабларга ташриф давомида карантин қоидаларига қатъий амал қилиш ҳамда ижтимоий масофа сақлаш сўралади», — дейилади вазирлик хабарида.
Изоҳ (0)