2020 йилнинг июнь ойида Ўзбекистонда истеъмол нархлари ва тарифлари даражаси ой давомида ўртача 0,2 фоизга пасайди. Бу ҳақда Давлат статистика қўмитаси томонидан эълон қилинган маълумотларда келтирилган.
Маълумотларга кўра, мева ва сабзавот нархларининг ўзгаришини ҳисобга олмаганда ушбу кўрсаткич даражаси 0,5 фоизни ташкил этган.
2020 йилнинг январь—июнь ойлари давомида истеъмол бозоридаги нархлар ва тарифлар ўртача 4,6 фоизга кўтарилган. Йиллик даврда эса (2019 йилнинг июнига нисбатан) товарлар ва хизматлар нархларининг ўртача ўсиш суръати 14,2 фоизни ташкил этган.
«2020 йилнинг июнь ойида йиллик умумий истеъмол нархлари индекси (ИНИ) ўтган ойнинг шу кўрсаткичига нисбатан 0,2 пунктга ошди (14,0 фоиздан 14,2 фоизгача). Шу билан бирга, ўтган йилнинг июнь ойига нисбатан 2020 йилнинг июнь ойидаги натижа 2019 йилнинг июнь ойидаги кўрсаткичга нисбатан 0,6 пунктга баланд бўлди (14,2 фоизга қарши 13,6 фоиз)», — дейилади хабарда.
Бозорларнинг янги мева-сабзавот маҳсулотлари ҳосили билан тўйинганлиги сабабли ушбу товарлар гуруҳи умумий нархларининг пасайишига олиб келиб, натижада шу йилнинг июнь ойида озиқ-овқат маҳсулотларининг ИНИ 98,8 фоизни ташкил этган.
Таъкидланишича, ой давомида ноозиқ-овқат маҳсулотлар ва хизматлар нархлари 0,6 фоизга қимматлашган.
Изоҳ (0)