Бош прокуратура: Андижонда ИИБ ходимлари қийноқлардан вафот этган фуқарога у қимматбаҳо тошни олганига иқрор бўлиши учун зўрлик ишлатган

Андижон шаҳар ИИО ФМБ 4-сонли ИИБ ходимлари фуқаро А.Абдукаримовни ярим тунда уйидан машинага мажбурлаб ўтказиб олиб келиб, у қимматбаҳо «Рубин» тошини олганлигини бўйнига олиши учун унга зўрлик ишлатган; фуқаро ушбу жараён давомида олган тан жароҳатлари оқибатида 11 июнь куни вафот этган. Бу ҳақда Халқаро пресс-клубнинг 1 июль куни бўлиб ўтган сессиясида Бош прокуратура матбуот хизмати раҳбари Ҳаёт Шамсуддинов таъкидлаб ўтди, дея хабар бермоқда «Дарё» мухбири Мусулмонбек Иброҳимов.

30 май куни Республика шошилинч тез-тиббий ёрдам илмий маркази Андижон филиалига Андижон шаҳар «Наврўз» маҳалла фуқаролар йиғини Салоҳият кўчасида яшовчи фуқаро А.Абдукаримов тан жароҳатлари билан келиб тушган. Мазкур ҳолат юзасидан Андижон шаҳар прокуратураси томонидан терговга қадар текширув ўтказилиб, шу куннинг ўзида Андижон шаҳар Ички ишлар органлари (ИИО) фаолиятини мувофиқлаштириш бошқармаси (ФМБ) 4-сон ички ишлар бўлими (ИИБ) ходимларига нисбатан Жиноят кодексининг 206-моддаси 1-қисми (ҳокимият ёки мансаб ваколати доирасидан четга чиқиш) билан жиноят иши қўзғатилган.

«Аниқланишича, фуқаро А.Сотволдиев ‘Рубин’ қимматбаҳо тошини олиб қайтариб бермаётган А.Абдукаримовга нисбатан қонуний чора кўришни сўраб, ИИБга ёзма равишда мурожаат қилган. Мазкур мурожаат юзасидан текшириш ўтказаётган Андижон шаҳар ИИО ФМБ 4-сон ИИБ жиноят-қидирув гуруҳи уч нафар тезкор вакили 29 май куни соат тахминан 22:00 ларда фуқаро А.Абдукаримовнинг яшаш хонадонига бориб, ўзларига қонун билан берилган ваколатлар доирасидан четга чиқадиган ҳаракатларни қасддан содир этган. Жумладан, улар А.Абдукаримовни автомашинага мажбурлаб ўтказиб, 4-сон ИИБнинг маъмурий биносига олиб келган ва юқорида кўрсатилган қимматбаҳо тошни олганлиги ҳақида иқрорлик кўрсатуви беришга мажбурлаш мақсадида зўрлик ишлатиб босим ўтказган», — деди Ҳаёт Шамсутдинов.

Бош прокуратура матбуот котибининг таъкидлашича, ИИБ ходимлари фуқаро А.Абдукаримовни 30 май куни тонг соат 06:00 га қадар бўлимда ноқонуний ушлаб туриб, унинг ҳуқуқлари ва қонуний манфаатларига жиддий зарар етказган. Абдукаримовнинг соғлиғи ёмонлашиб, ҳушини йўқотганлиги сабабли, у ИИБдан Республика шошилинч тез-тиббий ёрдам илмий маркази Андижон филиалига олиб келинган.

Иш бўйича ўтказилган суд-тиббий экспертизасининг дастлабки маълумотномасида А.Абдукаримов оғир тан жароҳати олганлиги кўрсатилган. Жабрланувчига шифокорлар томонидан барча тиббий ёрдамлар кўрсатилган бўлишига қарамай, у олган оғир тан жароҳатлари оқибатида 11 июнь куни вафот этган. Мазкур жиноят иши 16 июнь куни Бош прокуратуранинг Ўта оғир жиноятларни тергов қилиш бошқармаси иш юритувига олинган.

«Ҳозирда жиноят иши бўйича дастлабки тергов ҳаракатлари давом эттирилмоқда. Натижаси ҳақида қўшимча равишда ахборот берилади», — дея қўшимча қилди Ҳаёт Шамсуддинов.