Vazirlar Mahkamasining qaroriga binoan, Farhod Mahmudov O‘zbekiston Milliy teleradiokompaniyasi raisining birinchi o‘rinbosari etib tayinlandi. Bu haqda O‘zA xabar berdi.
Shu paytga qadar Milliy teleradiokompaniyasi raisining birinchi o‘rinbosari lavozimida ishlab kelgan Xayrulla Nuritdinov boshqa ishga o‘tishi munosabati bilan ushbu lavozimdan ozod qilindi. U 2018-yilning avgust oyidan buyon mazkur lavozimni egallab turgandi.
Mazkur tayinlovga qadar Farhod Mahmudov 2019-yilning sentabr oyidan buyon O‘zbekiston Prezident administratsiyasi rahbari o‘rinbosari lavozimida ishlab kelayotgandi.
Ungacha O‘zMTRK “O‘zbekiston 24” telekanali bosh muharriri lavozimida ishlagan Farhod Mahmudov 2018-yil sentabrida Ommaviy axborot vositalari, ma’naviyat va ma’rifat, madaniyat, san’at va ijodiy tashkilotlarni rivojlantirish masalalari xizmati bo‘yicha Prezident maslahatchisiga o‘rinbosar etib tayinlangan edi.
Farhod Mahmudov 1973-yil Toshkent viloyati Chinoz tumanida tug‘ilgan. U 1996-yil Toshkent davlat universitetini tamomlagan. Ma’lumoti bo‘yicha mutaxassisligi jurnalist. 2008-yil “Mehnat shuhrati” ordeni, 2018-yilda “O‘zbekistonda xizmat ko‘rsatgan jurnalist” faxriy unvoni bilan taqdirlangan.
Farhod Mahmudov 1995-yildan buyon O‘zMTRK tizimida turli lavozimlarda faoliyat ko‘rsatgan.
Izoh (0)