Ижтимоий тармоқларда бир гуруҳ аёллар бошқа бир аёлни ерга ётқизиб ураётгани акс этган видео тарқалганди. Қашқадарё вилояти ИИБ матбуот хизмати ҳолат Чироқчи туманида юз берганини маълум қилди.
Қайд этилишича, 24 июль куни соат 22:30 ларда Чироқчи туманида яшовчи аёл Д.И. 102 рақамига мурожаат қилиб, у билан бирга расмий никоҳсиз яшаб келаётган эркак Н.П.нинг онаси хонадонига келиб жанжал кўтараётганини маълум қилган.
Ҳодиса жойига профилактика инспектори етиб бориб, жанжални бартараф этиш мақсадида эркакни туман ИИБ биносига олиб келган. Унинг расмий никоҳида бўлган аёли қариндошлари билан бирга жамоат жойида “Сенга эрим керакми?” деб, Д.И.нинг бир неча маротаба танасининг турли жойларига тепиб, уриб, кийимсиз ҳолатда қолдирган.
Мазкур ҳолатларнинг видеотасвири ижтимоий тармоқларда тарқалиб жамоатчилик эътирозига сабаб бўлган.
Хабарда айтилишича, профилактика инспектори томонидан тўлиқ терговга қадар текширув ҳаракатлари олиб борилган ва процесс иштирокчиларининг олган тан жароҳати оғирлик даражасини аниқлаш мақсадида судга оид тиббий экспертиза тайинланган.
Ҳолат юзасидан Чироқчи туман ИИБ ҳузуридаги Тергов бўлинмаси томонидан жиноят кодексининг 277-моддаси (безорилик) 1-қисми билан жиноят иши қўзғатилиб, тергов ҳаракатлари олиб борилмоқда.
Ушбу моддага кўра, жамиятда юриш-туриш қоидаларини қасддан менсимаслик, уриш-дўппослаш, баданга енгил шикаст етказиш БҲМнинг 50 бараваридан 100 бараваригача (20,6 миллион сўмдан 41,2 миллион сўмгача) миқдорда жарима ёки 300 соатгача мажбурий жамоат ишлари ёхуд 3 йилгача ахлоқ тузатиш ишлари билан жазоланади.
Изоҳ (0)