Тошкентда 30 июнь, сешанба куни ДХХ, ИИВ, Тошкент шаҳар ДХХБ ҳамда ИИББ ходимлари билан ҳамкорликда яширин фаолият олиб борган «Тавҳид ва жиҳод катибаси» («ТЖК» Ўзбекистон Республикаси Олий судининг 2016 йил 26 сентябрдаги қарори билан террорчилик ташкилоти деб топилиб, Ўзбекистонда унинг фаолияти тақиқланган) халқаро террорчилик ташкилотининг бир гуруҳ тарафдорлари фош этилди. Бу ҳақда ИИВ ахборот хизмати хабар қилган.
ИИВ ҳузуридаги Тергов департаменти юритувида бўлган жиноят иши доирасида Тошкент шаҳрининг Олмазор ва Шайхонтоҳур туманлари ҳудудидаги 8 та манзилда тинтув ўтказилиб, 11 нафар шахс ички ишлар идораларига келтирилган.
Мавжуд маълумотларга кўра, мазкур шахслар ҳозирда Сурияда фаолият олиб бораётган «ТЖК» жангариларининг ғоявий таъсирига тушган ҳолда Тошкент шаҳрида яширин гуруҳ тузиб, ноқонуний йиғилишлар давомида интернет тармоғи орқали кўчириб олинган экстремистик мазмундаги материалларни муҳокама қилган. Улар «ҳижрат» ва «жиҳод» амалларини бажариш мақсадида Сурия давлатига чиқиб кетишни режалаштирган.
Ушланган шахсларнинг яшаш манзилларидан жиноятга алоқадор бўлган ашёвий далиллар топилиб, қонуний тартибда расмийлаштириб олинган. Тергов-суриштирув тадбирлари давом эттирилмоқда.
Аввалроқ 2020 йил 24 июнда Тошкентда халқаро террорчилик ташкилотининг 25 нафар аъзоси қўлга олингани, 9 июнда Бойсунда «Жиҳодчилар» гуруҳи ИИВ ва ДХХ томонидан ушлангани, 28 майда Фарғонада «Ҳизб ут-Таҳрир» террорчилик ташкилоти аъзолари қўлга туширилгани ҳақида хабарлар берилганди.
Изоҳ (0)