Ўзбекистонда Олмалиқ кон-металлургия комбинати ташаббуси ва илмий тадқиқотлари туфайли биринчи бор юқори тозаликдаги 99 фоизлик соф палладий кукунини олишга эришилди. Бу ҳақда комбинат ахборот хизмати хабар қилган.
Тозаланган соф палладий кукунини ажратиб олиш учун 17 та жараённи босиб ўтиш талаб этилади. Ўтказилган тадқиқотлар асосида паст концентрацияли электролит эритмаларидан юқори тозаликка эга бўлган соф палладий кукунини ажратиб олишнинг янги технологияси ишлаб чиқилиб, металл ажратиб олиш даражаси 80 фоизга олиб чиқилди.
«Бугун дунё бозорида 1 грамми 67 долларга баҳоланаётган палладий ишлаб чиқариш саноати йилдан йилга соҳавий тарзда такомиллашиб бормоқда. Платинадан 7,3 фоизга қиммат юрадиган бу нодир металл асосан заргарлик, тиббиёт, хусусан, стоматология соҳасида, электроника, машинасозлик ва кимёвий ишлаб чиқариш тармоқларида кенг қўлланилади. Палладий ишлаб чиқариш саноатининг 40 фоизи, асосан, Жанубий Африка Республикаси ҳамда Россия, Шимолий Америка ҳамда Зимбабве ҳиссасига тўғри келмоқда», – дейилади хабарда.
«Дунё миқёсида мазкур нодир металлга бўлган талаб жуда юқори. Улар ҳар доим ҳам рудаларда етарли даражада учрамайди. Шу маънода Олмалиқ кон-металлургия комбинати АЖ томонидан мис ишлаб чиқариш чиқинди шлам маҳсулотларининг қайта ишланган электролит эритмаларидан қимматбаҳо металлни тўлиқ ва соф ҳолатда ажратиб олишнинг янги технологияларини яратиш ва такомиллаштиришга йўналтирилган илмий-тадқиқотлар муҳим аҳамият касб этади. Комбинат раҳбариятининг топшириғи билан соф ва ўта тоза палладий металлини ажратиб олиш борасида 2018 йилнинг ноябрь ойидан буён илмий тадқиқот ишлари олиб борилди. Мақсад палладий миқдори кам бўлган чиқинди электролит эритмаларидан, гарчи 50 миллиграмм 1 литрда бўлган тақдирда ҳам соф палладий кукунини ажратиб олиш усулини ишлаб чиқишдан иборат эди.
Бугунги кунда ҳатто 40 миллиграмм палладий бир литр эритмада қолгунча чўкмага тушириб олинмоқда. Аввалги технологик йўриқномаларда бундай натижаларга эришилмаганди. Чўктирилган палладий комплексини куйдириш ва қайта тиклаш жараёнларини қайта тадқиқ қилиш асносида пиро-гидрометаллургик оптимал параметрлар ишлаб чиқилди. Палладий таркибли эритмаларни зарарли қўшимчалардан тозалаш ва фойдали металларни ажратиб олиш учун ишлаб чиқаришга жўнатишни мўлжалловчи комплекс чўктириш ва тозалаш усуллари саноатга жорий этилди» – деган ОКМК Янги технологиялар марказий лабораторияси Мис металлургияси бўлинмаси бошлиғи Орифжон Усмонқулов.
Изоҳ (0)