Жиззахда маст ҳолда севган қизи билан учрашувга келган ва у ерда чорва боқаётган 14 ёшли қиз ва бошқаларни кўриб, уларни ҳайдаш мақсадида ҳақорат қилган, ўсмир қизнинг отаси ҳамда укасини урган 29 ёшли йигит ҳибсга олинди. Бу ҳақда ИИВ ҳузуридаги Тергов департаменти хабар қилган.
Хабарга кўра, 29 ёшли Б.У. 2020 йил 24 июнь куни соат тахминан 17:00 да маст ҳолатда Captiva машинасида Жиззах шаҳар «Шодлик» МФЙ Обод кўчасига бориб, Н исмли қиз билан суҳбатлашаётган вақтида бу ерда вояга етмаган 14 ёшли М.Т. ва бошқа фуқароларни чорва боқаётганлигини кўриб, уларни ҳайдашга уринган. Б.У. атрофдагиларни куракда турмайдиган сўзлар билан ҳақорат қилиб, қўрқитмоқчи бўлган. Ҳеч бир сабабсиз безорилик ҳаракатларини олдини олиш чорасини кўрган М.Т.нинг отаси Л.Б. ва укаси Б.Б.нинг юз ва бош соҳасига тош билан уриб, тан жароҳати етказган.
Л.Б. ва Б.Б. олган тан жароҳатлари билан Республика шошилинч тиббий ёрдам марказининг Жиззах филиали тиббиёт бўлимига ётқизилган.
Ҳолат юзасидан фуқаро Б.У.га нисбатан Жиззах шаҳри бўйича ИИО ФМБ ҳузуридаги тергов бўлими томонидан Жиноят кодексининг 277-моддаси 3-қисми «г» банди (Безорилик) билан жиноят иши қўзғатилган.
Дастлабки тергов жараёнида Б.У. жиноят ишида айбланувчи тариқасида ишда иштирок этишга жалб қилинган ва унга нисбатан қамоққа олиш тарзидаги эҳтиёт чораси қўлланилган. Жиноят иши бўйича дастлабки тергов ҳаракатлари олиб борилмоқда.
Изоҳ (0)