Ўзбекистонда хизмат кўрсатган артист, дубляж устаси, таниқли актёр Ҳошим Арслонов 29 май куни 64 ёшида оламдан ўтди.
Режиссёр Акром Шахназаров ҳамда продюсер Равшан Норбаев томонидан суратга олинган «101-рейс» фильми Ҳошим Арслоновнинг энг сўнгги, ҳали катта экранларга чиқмаган фильми бўлиб қолди. Фильм режиссёри Акром Шахназаров «Дарё» мухбири Феруз Муҳаммадга берган интервьюсида Ҳошим Арслонов билан боғлиқ энг катта армони ҳақида гапириб берди.
Ҳошим акам билан бундан 3 йил аввал танишганман. «101-рейс» фильми проба жараёнларида топшириқ бераётганимда ёш режиссёр сифатида мени бу камтарин ва босиқ инсоннинг салобати босарди.Фильмда бош қаҳрамон ролига Ҳошим ака ҳам проба топшириб кўрган эдилар, кейин бу ролга тасдиқланганликлари ҳақида хабар берганмизда келиб ишонмагандилар.
Фото ва видео пробаларга келиб кетавериб, умидларини узган эканлар. Мен «Ҳошим ака, табриклайман. Сиз синовдан ўтиб, ролга тасдиқландингиз» деб айтганимда ғалати жимлик пайдо бўлган эди. Кейин ташқарига чиққанимизда «Акром, мен ҳаракат қиламан, менга ишонч билдирган экансизлар, қўлимдан келганича ҳаракат қиламан», деб айтгандилар. Мен ўшанда шунча йиллик тажрибага эга инсоннинг «қўлимдан келганча ҳаракат қиламан» дейишини эшитиб ҳайрон қолганман.
Офисимиздан чиқиб уйларига кетишларида бутун ижодлари кўз олдиларидан ўтиб, кўнгиллари бўшаб кетган эканлар. Сабаби айнан ўшанда театрдан кетган пайтлари ва бош қаҳрамонни ўйнамаган вақтлари экан.
Жараён бошланиб кетди. Бир неча ой инглиз тили курсларига бордилар. Самолёт билан боғлиқ ҳолатларни ҳақиқий учувчилардек ўргандилар. Тасвирга олиш жараёнлари 3 йил давомида қишда ҳам, ёзда ҳам давом этди, актёрларга қийин бўлди.
Суратга олишнинг охирги куни ёдимда қолган: жуда ҳам шошдилар, чунки эртаси куни Умра сафарига кетишлари керак эди. Ўшанда устоз билан охирги марта гаплашганман. «Ҳошим ака, бу рол халқ кутган рол бўлади. Айни охирида кулминацион нуқта бўлади, менга вақт керак» деб тушунтирганимда, шошилиб турган устозим телефонларини ўчириб қўйганлар ва ишга шўнғигандилар, 2 соатлик жараёнга 8 соат вақт ажратиб берган эдилар.
Сафардан қайтганларидан кейин телфонда галашдим. Салом-аликдан кейин биринчи айтган гаплари: «Акром, материалларни кўриб чиқдингми? Камчилик йўқми?» Кейин мен «Камчиликлар йўқ, ҳаммаси жойида!» деб айтганимда «Аллоҳга шукр!» дегандилар, овозлари жуда хаста эди.
Менда битта нарса армон бўлиб қолди, лекин бу нарсани 3 йил аввал устозимга айтган эдим: «Устоз, балки дубляжга бошқа киши овоз бериши ҳам мумкин, чунки сизнинг овозингиз халқнинг қулоғига ёд бўлиб кетган». Шу гаплар энди кўз олдимдан ўтяпти. Ўша пайтда гап келганда айтганман, энди бўлса ким бу вазифани бажаришини ўйлаб ўйимга етолмаяпман.
Охиратлари обод бўлсин! Бу фильмга бор меҳрларини бериб кетдилар, илоҳим халқимизга манзур келсин!
Акром Шахназаров, «101-рейс» фильми режиссёри
Изоҳ (0)