Франциянинг собиқ бош вазири Франсуа Фиён давлат маблағларини талон-торож қилгани учун беш йилга озодликдан маҳрум этилди. Бу ҳақда Meduza хабар берди.
Собиқ сиёсатчининг рафиқаси Пенелопа Фиён шерик сифатида уч йилга шартли равишда озодликдан маҳрум этилди. Шунингдек, уларнинг ҳар бири 375 минг евро жаримага тортилди.
1998 йилдан 2013 йилгача Франсуа Фиённинг рафиқаси ва икки фарзанди унинг ёрдамчиси, шу жумладан, Франция Миллий ассамблеяси депутати сифатида ишлаган. Амалда эса улар ҳеч қандай иш бажармаган. Шу тариқа оила 1,08 миллион еврони қўлга киритган.
Жаримадан ташқари, улар ёлғон йўл билан олинган пулларни қайтариши керак бўлади. Шунингдек, Франсуа Фиёнга 10 йил давомида сайланадиган лавозимни эгаллаш ҳам тақиқланди.
Маълум қилинишича, суд Фиёнларни ҳибсга олишга ордер бермаган ва улар суд залини тарк этган. Уларнинг адвокатлари суд қарори устидан шикоят қилади.
Франсуа Фиёнга нисбатан айблов 2017 йилнинг март ойида, Францияда президентлик сайлови кампанияси давом этаётган пайтда эълон қилинган. Фиён ўнглар ва марказчилардан номзод бўлган, у президентлик пойгасида фаворит сифатида кўрилган. У тергов кетаётган бўлса ҳам сайловда иштирок этишдан бош тортмаган.
Президентлик сайловининг биринчи турида Франсуа Фиён Эммануэль Макрон ва Марин Ле Пендан кейин учинчи ўринни эгаллаган. У ўз мағлубиятини тан олган ва сайловчиларни иккинчи турда Макрон учун овоз беришга чақирган.
Аввалроқ Қирғизистоннинг собиқ бош вазири Сапар Исоқов коррупцияда айбланиб 18 йилга, Қирғизистоннинг собиқ президенти Алмазбек Атамбаевни катта таъсирга эга бўлган жиноятчи Азиз Батукаевни қамоқдан озод қилиш бўйича коррупцияда айбдор деб топилиб, 11 йилга озодликдан маҳрум қилингани ҳақида хабарлар берилганди.
Изоҳ (0)