Anti-Defamation Liga (ADL — АҚШдаги инсон ҳуқуқлари бўйича ташкилот) Facebook’ни бойкот қилишга чақирганидан сўнг йирик компаниялар ижтимоий тармоқларда реклама беришдан бош тортди, дея хабар берди Meduza.
Июнь ойининг ўрталарида ADL Stop Hate акциясини бошлади. Ташкилот АҚШда полициянинг зўравонлигига қарши норозилик намойишлари вақтида йирик компанияларни реклама харажатларини камайтиришга чақирди.
Хусусан, ташкилот компанияларга Facebook’га бериладиган рекламаларни кескин камайтириш таклифини берган.
Қайд этилишича, июнь ойи охирида 90 дан ортиқ компания Facebook’да реклама беришни тўхтатди. Жумладан, Starbucks, PepsiCo Inc., Diageo Plc, Verizon каби компаниялар ижтимоий тармоқда реклама беришни тўхтатганини эълон қилган.
Йирик компаниялар бошқа платформаларда ҳам реклама беришни рад эта бошлади. Масалан, Coca-Cola 1 июлдан бошлаб барча ижтимоий тармоқларда реклама беришни камида 30 кунга тўхтатишини маълум қилди.
Unilever (Lipton, Dove, Calve брендлари орасида маҳсулотлар ва маиший кимёвий маҳсулотлар ишлаб чиқарадиган компания) 27 июнь куни Facebook, Instagram ва Twitter’да ҳеч бўлмаганда йилнинг охиригача реклама беришдан бош тортаётганини маълум қилди.
Unilever ушбу қарорни эълон қилинганидан кейин Facebook акциялари 8,3 фоизга тушиб кетди ва компания асосчиси Марк Цукерберг бир кунда 7,2 миллиард доллар йўқотди.
ADL нотўғри маълумотларга қарши курашиш учун Facebook етарли иш қилмаётганини даъво қилмоқда. Ташкилотдан маълум қилишларича, ижтимоий тармоқ очиқчасига ёлғон сиёсий рекламаларни олиб ташлашдан бир неча бор бош тортган.
Июнь ойи бошида Facebook АҚШ президенти Дональд Трампнинг норозилик намойишлари ҳақидаги постини олиб ташлашдан бош тортди. Унда «талончилик бошланганда отишма бошланади» деган сўзлар мавжуд эди.
Цукербергнинг таъкидлашича, Facebook сиёсати сўз эркинлигини максимал даражада таъминлайди, шунинг учун президент пости ўчирилмайди. Трампнинг шунга ўхшаш хабари эса Twitter’дан ўчирилди.
Аввалроқ Трамп унинг постини ўчиргани учун Twitter’ни ёпиб юбориш билан таҳдид қилган эди.
Изоҳ (0)