Тошкент Молия институти ректори Улуғбек Азизов бошқа ишга ўтиши муносабати билан, унинг ўрнига шу вақтгача проректор лавозимида ишлаб келган Султонали Меҳмонов институт ректори вазифасини вақтинча бажарувчи этиб тайинланди.
«Ўзбекистон Республикаси Олий ва ўрта махсус талим вазиринининг буйруғига кўра, Меҳмонов Султонали Умаралиевичга Тошкент молия институтининг илмий ишлар ва инновациялар бўйича проректорига институт ректори вазифасини вақтинча бажариш юклатилди», — дея институт матбуот хизмати томонидан берилган маълумотни келтирмоқда «Kun.uz» .
Султонали Меҳмонов 1974 йилда туғилган. Маълумоти олий, иқтисодиёт фанлари доктори, профессор.
1996—2006 йилларда Тошкент давлат аграр университетида ректор ёрдамчиси, кафедра ассистенти, доценти, бош хисобчи, факультет декани ўринбосари лавозимларида фаолият кўрсатган. 2006—2017 йилларда Тошкент молия институтида кафедра доценти, кафедра мудири лавозимларида фаолият кўрсатган.
У 2017—2018 йилларда И.М.Губкин номидаги Россия давлат нефть ва газ университетининг Тошкент шаҳридаги филиали директори ўринбосари (ўриндошлик асосида Тошкент молия институти кафедра профессори) лавозимида фаолият кўрсатган, 2018—2019 йилларда Тошкент молия институти кафедра профессори лавозимида ишлаган.
2019 йил октябридан буён Тошкент молия институти илмий ишлар ва инновациялар бўйича проректори лавозимида фаолият кўрсатиб келаётганди.
2018 йил сентябридан буён олий таълим муассасасига раҳбарлик қилиб келган Улуғбек Азизов ҳозирда қайси ишга ўтгани ҳақида маълум қилинмаган.
Бундан аввал Турин политехника университети ректори Ўктам Саломов Ўзбекистон Олий ва ўрта махсус таълим вазирининг биринчи ўринбосари лавозимига тайинлангани хабар берилган эди.
Изоҳ (0)