Ўзбекистонда 28 июнь куни коронавирус инфекцияси тасдиқланган 266 нафар бемордан 16 нафари аҳоли орасида аниқланган бўлса, 29 июнь куни 274 нафар бемордан 30 нафари аҳоли орасида тасдиқланган. Шундан 20 нафари Тошкент шаҳрида аниқланди, деб хабар бермоқда Соғлиқни сақлаш вазирлиги.
Вазирликнинг қайд этишича, икки кунлик маълумотга кўра, ҳам умумий касалланиш кўрсаткичи, ҳам аҳоли орасида коронавирусга чалиниш ҳолати ошган.
Жумладан, Тошкент шаҳри Мирзо Улуғбек туманидаги яшовчи Ш.Ғ.да, Шайхонтоҳур, Миробод, Юнусобод, Сергели ва Учтепа туманларида яшовчи 8 нафар фуқарода 29 июнь куни касаллик қайд этилган. Улар тана ҳарорати кўтарилганлиги сабабли намуна топширган ва касаллик тасдиқланган.
Шунингдек, касаллик Миробод туманидаги хусусий оёқ кийим таъмирлаш устахонаси эгаси У.У.да, Mega Planet савдо мажмуасидаги «София» ширинлик дўкони ишчиси Д.Т.да, Сергели туманидаги «ENTER Engineering» компанияси ҳисобчиси Н.М.да, Республика ўсмирлар ва чақирилувчи ёшларга тиббий ёрдам ташкил этиш маркази муқобил тиббий комиссияси ҳамшираси Ш.Ш.да аниқланган. Ҳисобчи ва ҳамшира тана ҳарорати кўтарилганлиги сабабли намуна топширган ва уларда коронавирус борлиги маълум бўлган.
Бундан ташқари, Тошкент шаҳридаги «Кристал» савдо маркази кийим-кечак дўкони сотувчиси У.Р. Қозоғистонга кетаётганлиги учун намуна топширган ва унда касаллик қайд этилган. Юнусобод туманида яшовчи У.Б. Юнусобод деҳқон бозорига боргандан кейин тана ҳарорати кўтарилганлиги сабабли намуна топширган ва унда коронавирус тасдиқланган. «Абу Сахий» савдо маркази ходими С.Қ. ҳам тана ҳарорати кўтарилганлиги сабабли мурожаат қилган ва унда ҳам касаллик қайд этилган. Tashkent City қурилиш объекти ошпази М.М. ҳамда тана ҳарорати кўтарилганлиги сабабли намуна топширган ва коронавирусга чалингани маълум бўлган.
Ўзбекистонда коронавирус билан боғлиқ вазият тобора жиддийлашаётганини ҳисобга олиб, Республика махсус комиссиясининг қарори билан 2020 йил 1 июлдан бошлаб, қатор карантин чекловлари кучайтирилади. Ўзбекистондаги барча буюм бозорлари ҳафтанинг ҳар шанба ва якшанба кунлари ёпилади. «Қизил» ва «сариқ» ҳудудларда соат 23:00 дан кейин кўчада юриш тақиқланди. «Сариқ» ҳудудларида соат 22:00 дан кейин махсус рухсатномасиз юрган автомобилларга қарши назорат кучайтирилади.
Изоҳ (0)