Хитойда сўнгги суткада коронавирус билан касалланиш бўйича 12 та ва касаллик белгисиз ўтаётган 6 та ҳолат аниқланди, беморларнинг 9 нафари соғайди. Бу ҳақда Хитой Соғлиқни сақлаш миллий комиссиясига таяниб, «РИА Новости» хабар берди.
Аниқланган ҳолатларнинг 7 таси мамлакатнинг ўзида (Пекинда), 5 таси четдан юқтирилган.
Бир кун аввал коронавирус билан касалланиш бўйича 17 та ва касаллик белгисиз ўтаётган 7 та ҳолат аниқланганди. Уларнинг аксарияти Пекиннинг Фэнтай ҳудудидаги «Синьфади» улгуржи бозори билан боғлиқ бўлиб, бозор 13 июнь куни ёпилган.
Мамлакатда умумий ҳисобда 83 512 киши коронавирусга чалинган, уларнинг 78 450 нафари соғайган, 4634 нафар бемор COVID-19 қурбонига айланган. Касалхонада 418 киши даволанишда қолмоқда.
Жанубий Кореяда эса сутка давомида 42 киши коронавирусга чалингани қайд этилиб, касалланганларнинг умумий сони 12 757 нафарга етди.Касалликлар профилактикаси ва назорати маркази (KCDC) маълумотларига кўра, янги касалланиш ҳолатларининг 30 таси мамлакат ичида аниқланган бўлса, 12 таси четган кириб келганларда қайд этилган.
Ўтган бир сутка ичида 65 кишига касалхоналардан жавоб берилган. Тузалганларнинг умумий сони эса 11 429 нафарга етди. Касаллик қурбонлари сони ўзгармаган бўлиб, 282 нафарни ташкил этмоқда. Жанубий Кореяда ҳозирга қадар коронавирусга қарийб 1,26 миллион та тест ўтказилган.
Изоҳ (0)