Telegram’да одамларнинг 19 млн сўмдан кўпроқ пулини ўғирлаган 21 ёшли фирибгар қўлга тушди

Ички ишлар вазирлиги Telegram мессенжери орқали одамларни алдаб, электрон ҳисобидан пул ечиб олган фирибгар йигитнинг қўлга олинганини хабар қилди.

Хабарга кўра, Тошкент шаҳри Юнусобод туманида яшовчи Next савдо мажмуаси сотувчиси Ж.У. 10 май куни ўзига тегишли банк пластик картасидан 2 миллион 20 минг сўм пулни Telegram’да «Click ва UzCard расмий Диллери» номли аккаунт томонидан ечиб олинганини маълум қилган. У номаълум шахсни аниқлаб, қонуний чора кўришликни сўраган.

Ушбу ҳолат юзасидан Тошкент шаҳар ИИББ Тезкор-қидирув ҳамкорлиги бўлими ва Юнусобод тумани ИИО ФМБ Жиноят қидирув бўлими ходимлари тезкор суриштирув ишларини олиб борган. Натижада, Фарғона вилояти Бешариқ туманида доимий рўйхатда турувчи, шу туманда жойлашган мактабгача таълим муассасасида инглиз тилидан дарс берган ўқитувчи, Фарғона давлат университети талабаси, 1999 йилда туғилган П.Ж. ушбу жиноятни амалга оширгани аниқланган ва у қўлга олинган.

Ҳолат юзасидан олиб борилган суриштирув ишлари давомида П.Ж. жиноий ҳаракатларини амалга ошириш ва жиноят изларини яшириш мақсадида май ойининг бошларида Samsung J телефони ҳамда интернет орқали АҚШда рўйхатга олинган +1(747)251-5148 SIP телефон рақамига Telegram’дан «Click ва UzCard расмий Диллери» номли аккаунтни очгани маълум бўлди. У Click ва UzCard ташкилотлари номидан гуруҳ очиб, обуначиларни алдаган ва банк пластик карталарининг маълумотларини олиб, фуқароларнинг пулларини яширин равишда талон-торож қилган.

П.Ж. P2P халқаро пул ўтказмалар тизимига уланиб, жиноий йўл билан топилган 8 миллион сўм миқдоридаги маблағларни интернет тармоғи орқали легаллаштириб, отаси 1968 йилда туғилган вақтинча ишсиз Д.А.нинг номига очилган банк пластик картасига ўтказиб юборган.

П.Ж.нинг Тошкент шаҳри ҳудудида содир этилган ушбу турдаги бошқа жиноятларга алоқадорлиги тезкор йўллар билан текширилмоқда, дейилади ИИВ хабарида.