Рўзиқул Бердиев «Насаф»га ғалаба қозониш учун нима етишмаётганлигини айтди

Футбол бўйича Coca-Cola Суперлига 6-тури доирасида кечган «Насаф» ва «Бухоро» ўртасидаги (0:0) учрашувдан сўнг ҳар икки жамоа бош мураббийлари иштирокида матбуот анжумани ўтказилди.

Унинг дастлабки қисмида меҳмонлар устози Муҳсин Муҳаммадиев қатнашди.

«Қийин беллашув бўлди. «Насаф» ажойиб жамоа. Улар биздан устун эди, ўйинни назорат қилди ва кўплаб хавфли вазиятлар яратди.

Шогирдларимга раҳмат айтмоқчиман. Кўрсатмаларни тўлиқ бажаришди, охиригача сабр қилишди. «Насаф» Суперлига рестартига биздан кўра кўпроқ тайёргарлик олиб борди. Бизда эса бундай шароит ва имконият бўлгани йўқ. Ўйиндан олдин таркибимизда йўқотиш мавжуд эди. Беҳруз Шодмонов жароҳат олиб сафдан чиқди, бу ачинарли.

Яна бир бор йигитларга миннатдорчилик билдираман. Улар охиригача курашишди. Сафарда бир очко ишлаганимиздан хурсандмиз. Жамоамиздаги легионерлар пандемия бошланишидан олдин юртларига кетишган. Ҳозирда етиб кела олишмайди.

Ўтган йили «Насаф»ни Қаршида ютган эдик. Бу сафар дуранг қайд этдик. Мақсадимиз ўйинимизни кучайтириш. Биз учун ҳар бир ўйин финалга тенг», — дейди Муҳсин Муҳаммадиев.

Шундан сўнг «Насаф» бош мураббийи Рўзиқул Бердиев ўз фикрлари билан ўртоқлашди.

«Рақиб дарвозаси томон 20 га яқин зарба бердик, ғалабага эришиш учун вазиятлар ҳам ярата олдик. Лекин охирги нуқтани қўйиш, ҳужумларни якунлашда совуққонлик етишмаяпти. Йигитлар бугун ғалаба қозониш учун ҳаракат қилди. Ўйин бир томондан қониқтирди, аммо футболда натижа биринчи ўринда. Натижа бизни қониқтирмади. Рақиблар бизга юқори баҳо берган ҳолда фақат ҳимоявий ўйин танламоқда. Шунга қарамай вазиятлар яратдик, аммо гол ура олмадик. Очко кўп йўқотаяпмиз.

Тўғри, рестартдан кейин учта учрашувда дуранг ўйнадик, аммо кўрган бўлсангиз мана шу учала ўйинда рақиблардан устунлик қилдик. Футболда бундай ҳолатлар бўлиб туради», — дейди Бердиев.

Ушбу натижадан сўнг «Насаф» 12 очко билан 3-ўринга кўтарилган бўлса, «Бухоро» 2 очкоси билан 13-ўринда бормоқда.