Футбол бўйича Coca-Cola Суперлига 6-тури доирасида кечган «Сўғдиёна» — «Андижон» (1:1) учрашувидан сўнг ҳар икки жамоа мураббийлари матбуот анжуманида қатнашди.
Дастлаб, андижонликлар мураббийи Диёр Мирзабоев ўз фикрларини билдирди.
«Рақибимиз охирги иккита ўйинда Ўзбекистоннинг етакчи клубларини («Пахтакор» ва «Локомотив» — изоҳ «Дарё») мағлуб этганини барча билади. Рақиб ўз майдонида кўп ҳужум қилишини тахмин қилиб, ҳимоявий ўйин ташкил этдик. Қарши ҳужумда рақибни жазолашга уриндик. Менимча, дуранг адолатли натижа бўлди. Ютқазишимиз ҳам мумкин эди, биринчи бўлимда Усмонов кейинчалик Ибе ўз вазиятларидан унумли фойдаланганида умуман бошқача вазият бўларди.
Виктор Кумиков нега ҳамон қайдномадан ўрин олмаяпти? Бу саволни менга эмас, клуб раҳбариятига берилса тўғрироқ бўларди. Менга маълум бўлишича, ПФЛ билан ҳужжат бўйича муаммоларимиз бор. Бундан ташқари Кумиковнинг PRО лицензияси муддати ўтиб қолган, яқин орада лицензия муддатини янгилайди», — дейди Мирзабоев.
Матбуот анжуманининг иккинчи қисмида «Сўғдиёна» устози Улуғбек Бақоев ўз фикрлари билан ўртоқлашди.
«Иккита ғалабадан кейин қониқарсиз натижа қайд этдик. Барча ўйинни ютиб бўлмайди. Ҳакам ҳуштаги чалингунига қадар ўйнаш керак. Барча йигитларга ўйин учун раҳмат, кейинги ўйинларга тайёргарликни бошлаймиз.
Ҳимоявий ўйин кўрсатяпмиз? Бу сафар ундай бўлмади, икки ҳужумчи билан ўйнадик. Шунчаки гол урганимиздан кейин ҳимояга кўпроқ эътибор қилдик ва бир ҳужумчи билан ҳаракат қилдик. Бугун ҳимоядан ўйнашга мажбур қиладиган рақиб билан ўйнамадик.
Ҳакамлик? Уларга эътирозим йўқ. Шунчаки ўйин пайтида эҳтирослар жунбишга келади. Ҳакамларга ўйин учун раҳмат.
Захирадан майдонга тушган футболчилар ўйинни кучайтирди. Биз дарҳол гол урдик, ўйин жонланди. Шунчаки ўйин охирида концентрацияни йўқотиб қўйдик. Футболчиларга эътирозим йўқ, бу футбол. Рақиб чиройли гол урди», — дейди Бақоев.
Ушбу ўйиндан сўнг «Сўғдиёна» очколари сонини 8 тага етказиб «Навбаҳор»га етиб олган бўлса, «Андижон» 3 очко билан 12-поғонада бормоқда.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)