Futbol bo‘yicha Coca-Cola Superliga 6-turi doirasida kechgan “Nasaf” va “Buxoro” o‘rtasidagi (0:0) uchrashuvdan so‘ng har ikki jamoa bosh murabbiylari ishtirokida matbuot anjumani o‘tkazildi.
Uning dastlabki qismida mehmonlar ustozi Muhsin Muhammadiyev qatnashdi.
“Qiyin bellashuv bo‘ldi. “Nasaf” ajoyib jamoa. Ular bizdan ustun edi, o‘yinni nazorat qildi va ko‘plab xavfli vaziyatlar yaratdi.
Shogirdlarimga rahmat aytmoqchiman. Ko‘rsatmalarni to‘liq bajarishdi, oxirigacha sabr qilishdi. “Nasaf” Superliga restartiga bizdan ko‘ra ko‘proq tayyorgarlik olib bordi. Bizda esa bunday sharoit va imkoniyat bo‘lgani yo‘q. O‘yindan oldin tarkibimizda yo‘qotish mavjud edi. Behruz Shodmonov jarohat olib safdan chiqdi, bu achinarli.
Yana bir bor yigitlarga minnatdorchilik bildiraman. Ular oxirigacha kurashishdi. Safarda bir ochko ishlaganimizdan xursandmiz. Jamoamizdagi legionerlar pandemiya boshlanishidan oldin yurtlariga ketishgan. Hozirda yetib kela olishmaydi.
O‘tgan yili “Nasaf”ni Qarshida yutgan edik. Bu safar durang qayd etdik. Maqsadimiz o‘yinimizni kuchaytirish. Biz uchun har bir o‘yin finalga teng”, — deydi Muhsin Muhammadiyev.
Shundan so‘ng “Nasaf” bosh murabbiyi Ro‘ziqul Berdiyev o‘z fikrlari bilan o‘rtoqlashdi.
“Raqib darvozasi tomon 20 ga yaqin zarba berdik, g‘alabaga erishish uchun vaziyatlar ham yarata oldik. Lekin oxirgi nuqtani qo‘yish, hujumlarni yakunlashda sovuqqonlik yetishmayapti. Yigitlar bugun g‘alaba qozonish uchun harakat qildi. O‘yin bir tomondan qoniqtirdi, ammo futbolda natija birinchi o‘rinda. Natija bizni qoniqtirmadi. Raqiblar bizga yuqori baho bergan holda faqat himoyaviy o‘yin tanlamoqda. Shunga qaramay vaziyatlar yaratdik, ammo gol ura olmadik. Ochko ko‘p yo‘qotayapmiz.
To‘g‘ri, restartdan keyin uchta uchrashuvda durang o‘ynadik, ammo ko‘rgan bo‘lsangiz mana shu uchala o‘yinda raqiblardan ustunlik qildik. Futbolda bunday holatlar bo‘lib turadi”, — deydi Berdiyev.
Ushbu natijadan so‘ng “Nasaf” 12 ochko bilan 3-o‘ringa ko‘tarilgan bo‘lsa, “Buxoro” 2 ochkosi bilan 13-o‘rinda bormoqda.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)