Олег Зотеев Жанубий Корея клуби билан шартнома имзолади

Тошкентнинг «Локомотив» клуби ҳимоячиси Олег Зотеев фаолиятини Жанубий Кореяда давом эттиради.

30 ёшли футболчи Кей-Лига 2 мусобақаси вакили «Чоннам Драгонс» билан 1,5 йиллик шартнома имзолаган. Зотеев Жанубий Корея етиб боргач, икки ҳафта карантинда бўлган. Футболчи 26 июнь куни тиббий кўрибдан ўтган ва шундан сўнг шартнома имзолаган.

Зотеев янги жамоасида ҳам 33-рақам остида ҳаракат қилади.

«Агентим Рауль менга Жанубий Корея клубидан қизиқиш борлигини айтгач, фаолиятимни хорижда давом эттириш истаги туғилди. Албатта, ҳар бир футболчи ўзини четда синаб кўришни хоҳлайди. Менда ҳам шундай имконият юзагани келгани учун фойдаланишга қарор қилдим.

Шартнома имзолангач клуб ва жамоа билан танишдим. Янги жамоам билан бугун биринчи марта машғулот ўтказдим. Ҳаммаси яхши ўтди. Мени клуб ва мураббийлар яхши кутиб олишди. Бундан жуда хурсандман», — дея Зотеев сўзларини келтирмоқда «Локомотив» матбуот хизмати.

Зотеев «Пахтакор» тарбияланувчиси ҳисобланиб, фаолияти мобайнида ОКМК, «Бунёдкор» ва «Локомотив»да тўп сурган.

«Чоннам Драгонс» Жанубий Корея иккинчи дивизиони жорий мавсумида 7-турдан сўнг 10 очко тўплаган ҳолда, 6-ўринда бормоқда.

Мазкур лиганинг «Анянг» жамоасида яна бир ўзбекистонлик футболчи Хуршид Ғиёсов тўп суради. Шунингдек, Кей-Лигада Икром Алибоев («Сеул»), Жамшид Искандаров («Соннам»), Рустам Ашурматов («Кванжу») ва Достон Турсунов («Пусан Ай Парк») каби Ўзбекистон вакиллари ҳаракат қилади.