Ҳиндистонда охирги бир суткада коронавирусга чалинганлар сони 18,5 мингтага кўпайди ва мамлакат бўйлаб бу кўрсаткич жами 508 953 ни ташкил этди. Бу ҳақда Ҳиндистон Соғлиқни сақлаш ва оилавий фаровонлик вазирлигига таяниб, «РИА Новости» хабар берди.
Таъкидланишича, ҳозирда мамлакатда 197 387 киши даволанмоқда. Охирги 24 соат ичида 10 244 нафар бемор COVID-19’дан соғайиб, касалликдан тузалганлар сони жами 295 880 кишига етди.
Шунингдек, Ҳиндистонда охирги суткада 384 киши коронавирусдан вафот этиб, бу борада умумий кўрсаткич 15 685 тага етди.
Жонс Ҳопкинс университетининг 27 июнь соат 13:30 да берган маълумотга кўра, Ҳиндистон коронавирусга чалинганлар сони бўйича дунёда тўртинчи ўринда бормоқда. Ундан аввал жадвалда Россия (619 936 киши), Бразилия (1 274 974 киши) ва АҚШ (2 467 837 киши) қайд этилган.
Аввалроқ мамлакат ҳукумати касалланганлар сони минимал бўлган ҳудудларни изоляция режимидан босқичма-босқич чиқаришни бошлади. Жорий йилнинг 8 июнь куни ибодатхоналар, меҳмонхоналар, ресторанлар ва савдо марказларини очилишга рухсат берилди. Эпидемиологик хавфли деб топилган жойларда изоляция режими 30 июнгача узайтирилди.
Изоҳ (0)