Президент Шавкат Мирзиёевнинг 12 июнь куни Тошкент шаҳрининг Олмазор туманига қилган ташрифи якунларига кўра, жумладан, умумтаълим мактаблари учун мўлжалланган «Тарбия» дарсликларини тайёрлаш бўйича буюртмани Ғафур Ғулом номидаги нашриётдан олиб, «КолорПак» компаниясига ўтказиш ҳақида топшириқ берилган. Бу ҳақда «Дарё»нинг расмий доиралардаги манбаси маълум қилди.
Маълум қилишларича, ташриф якунларига кўра Президент маслаҳатчиси Абдужаббор Абдувоҳидов ва халқ таълими вазири Шерзод Шерматовга 2020/2021 ўқув йили учун умумтаълим мактабларида дарслик ва ўқув-методик мажмуалари сифатини тубдан ўзгартириш ва замонавий стандартларга мослаштириш мақсадида «КолорПак» компанияси томонидан 1—9-синфлар учун «Тарбия», 5 ва 8—9-синфлар учун «Информатика ва ахборот технологиялари» дарсликлари ва ўқув-методик мажмуаларини ягона дизайн ва услубда нашрга тайёрлаш ҳамда чоп этиш бўйича тегишли чораларни кўриш бўйича топшириқ берилган.
«Тарбия» қандай фан?
Президент Шавкат Мирзиёев раислигида 2019 йил 23 август куни бўлиб ўтган йиғилишда «Миллий ғоя», «Одобнома», «Дин тарихи», «Ватан туйғуси» каби фанлар негизида ягона «Тарбия» фанини жорий этиш юзасидан топшириқ берилган. Халқ таълими вазирлигидан маълум қилишларича, яратилаётган янги форматдаги «Тарбия» дарсликлари амалиётга йўналтирилиб, болани муваффақиятли мустақил ҳаётга тайёрлашни асос қилиб олган. Шунингдек, ўқувчини соғлом турмуш тарзи, вақт ҳамда ресурслардан унумли фойдаланишга ўргатади. Дарслик ахлоқ, умуминсоний ва миллий қадриятларга ҳурмат, фаол фуқаролик, мақсад қўйиш ва интилиш кўникмалари машғулотлар орқали шакллантиради.
Таъкидланишича, айнан Олмазор туманига ташриф якунларига кўра халқ таълими вазири Шерзод Шерматовнинг истисно тариқасида 2020/2021 ўқув йилидан бошлаб дарслик ва ўқув-методик мажмуаларни чоп этишда матн ва муқова учун ўқувчи кўзини чарчатмайдиган (салбий таъсир қилмайдиган), вазни енгил қоғоз (пухлая бумага — 55-60 гр/м2, пухлост 1,6-2, оқлиги 86 фоиздан юқори, целлюлоза картони) турларидан фойдаланиш ва мавжуд 60*90 1/8 бичимга қўшимча равишда 60*84 1/8, 84*108 1/16 бичимларда чоп этиш тўғрисидаги таклифига ҳам розилик берилган.
«Талаб этилган шартлардаги маҳсулотни зудлик билан фақат ‘КолорПак’ тайёрлаб бера олди»
Халқ таълими вазирлигидан маълум қилишларича, Президент Шавкат Мирзиёевнинг Сергелига ташрифи чоғида Халқ таълими вазирлигига умумтаълим мактаблари учун дарсликларнинг сифати, мазмуни, дизайни ва жозибадорлигини яхшилаш ҳамда 2020/2021 ўқув йили учун дарслик ва ўқув-методик мажмуалари сифатини тубдан ўзгартириш ва замонавий стандартларга мослаштириш бўйича топшириқлар берилган.Топшириқлар ижросини таъминлаш мақсадида Кембриж университетининг Cambridge University Press (Буюк Британия), Оксфорд университетининг Oxford University Press (Буюк Британия), Германиянинг Klett-Verlag, Hueber Verlag, Сингапурнинг Star Publishing нашриётлари томонидан, шунингдек, Жанубий Корея ва Японияда чоп этилган дарсликлар, машқ дафтарлари, ўқитувчи китоби каби ўқув-методик мажмуалар намуналари ўрганилган.
«Тарбия» фани дарслиги дастлабки режага асосан Ғафур Ғулом номидаги нашриёт томонидан 1—2—3, 5—6-синфлар учун, Ўзбекистон» нашриёт-матбаа ижобий уйи томонидан эса 4 ҳамда 7—8—9-синфлар учун нашрга тайёрлаш белгиланган. Бироқ Халқ таълими вазирлигидан маълум қилишларича, нашриётлар томонидан ишлар суст ташкил этилиб, яратилаётган дарсликларни нашрга тайёрлаш ва чоп этишда эскича усул сақланиб қолаётганлиги кўринди.
«Мазкур шароитда ‘Тарбия’ дарсликларини янгича дизайн ва услубда, сифатли қоғоз ва бўёқларда нашр этилмаслик хавфи юзага келди», — дейилади ХТВнинг «Дарё»га тақдим этилган изоҳида. Вазирликдан қайд этишларича, ҳозирда давлат нашриётларида замонавий дизайнерлар ва саҳифаловчи мутахассислар, рассом ва муҳаррирлар етишмайди, корхоналарнинг эскича ишлаш услуби дарсликларни белгиланган талаб бўйича, тез муддатларда яратиш имконини бермайди.
Сергелидаги топшириқ ижросини таъминлаш мақсадида зудлик билан 2020 йилда янгидан яратилиши белгиланган «Тарбия» ва «Информатика ва ахборот технологиялари» дарсликларининг намуналари халқаро талаблар асосида чоп этилган. Халқ таълими вазирлигидан маълум қилишларича, бундай маҳсулотни оператив равишда замонавий матбаа технологик парки мавжуд бўлган «КолорПак» компаниясигина чиқариб бера олган.
«‘Тарбия’ ва ‘Информатика ва ахборот технологиялари’ дарсликларининг намуна нусхалари Президент Шавкат Мирзиёевнинг Олмазор туманига ташрифи чоғида тақдимот қилинди (муқовалаш услуби, қоғоз тури ва сифати, дизайн концепцияси матбаа сифати жиҳатидан) ва давлат раҳбари томонидан маъқулланди», — дейилади ХТВ изоҳида.
Шу муносабат билан 1—9 синфлар учун 70 номдаги 6 миллион нусха «Тарбия» дарсликларини нашрга тайёрлаш ва чоп этиш бўйича «КолорПак» компанияси бош пудратчи сифатида вазирлик билан шартнома тузиши белгиланган. Шартномага мувофиқ, «КолорПак» дарсликларни ягона дизайн ва услубда нашрга тайёрлаш, чоп этилишида техник назоратни таъминлашга ва тақдимотда тасдиқланган форматдаги дарсликни яратишга масъул бўлади, зарур бўлса, нашриётларга янги форматдаги қоғозни ҳам етказиб бериш масъулиятини олган.
«Қайд этиш керакки, мазкур қоғоз амалда нашриётлар томонидан ишлатиладиган қоғоздан фарқ қилади ва унинг нархи арзонроқ», — дейилади Халқ таълими вазирлиги изоҳида.
Халқ таълими вазирлигидан «Дарё»га маълум қилишларича, «Тарбия» дарсликларини чоп этиш ишлари «КолорПак» компанияси ва Ғафур Ғулом номидаги нашриёт-матбаа ижодий уйи (28 номда 2,6 миллион нусха), «Ўзбекистон» нашриёт-матбаа ижодий уйи (21 номда 1,9 миллион нусха), «Сано Стандарт» компанияси (7 номда 650 743 нусха), «Замин нашр» нашриёти ва «КредоПринт» компанияси (10 номда 692 минг нусха) матбаа корхоналари ҳамкорлигида амалга оширилади.
Бундан ташқари, «КолорПак» компанияси 42 номда 2 миллион нусха 5, 8—9-синфлар учун «Информатика ва ахборот технологиялари» дарсликлари ва ўқув методик мажмуаларини чоп этиши ҳам белгиланган. Вазирликнинг қайд этишича, бу 2020/2021-ўқув йили учун мўлжалланган жами дарсликларнинг 7 фоизидир.
«Ғафур Ғулом номидаги нашриёт билан фақат ‘Тарбия’ дарсликларини нашрга тайёрлаш ва чоп этиш бўйича аввал тузилган шартномаларга ўрнатилган тартибда тегишли ўзгартиришлар киритилган ҳолда, ўзаро ҳисоб-китоблар амалга оширилади, бошқа дарсликлар бўйича нашр ишлари давом эттирилади», — дея қўшимча қилинган Халқ таълими вазирлиги изоҳида.
«КолорПак» ҳақида
«КолорПак» компаниясига 2004 йилда асос солинган. Корхона ва ташкилотларнинг ягона давлат регистри маълумотларига кўра, «КолорПак» матбаа фаолиятининг бошқа турлари билан шуғулланувчи, давлат ва хўжалик бошқаруви органлари таркибига кирмайдиган тадбиркорлик субъектидир.Давлат активларини бошқариш агентлигидан маълум қилишларича, «КолорПак» компанияси 2018 йили Тошкентнинг Юнусобод тумани Янги шаҳар кўчаси 1-А уй манзилида жойлашган собиқ полиграфия бино-иншоотларини сотиб олган (ҳукумат қарорида қайд этилишича, ушбу объект «КолорПак»га инвестиция ва ижтимоий мажбуриятларни киритиш шарти билан «нол» қийматда сотилган).
Агентликнинг қайд этишича, «янги инвестор зиммасидаги мажбуриятни ортиғи билан бажарган». «Сотиб олинган бинода халқаро талабларга мос равишда матбаа маҳсулотларини ишлаб чиқаришга мўлжалланган замонавий корхона барпо этилди. Бунинг учун 25,2 миллиард сўм ва 15,2 миллион евро миқдорида сармоя жалб қилиниб, 200 нафардан зиёд киши иш билан таъминланди», — дейилади «Давактив» ахборотида.
«КолорПак» компаниясининг 50 фоиз улуши Шуҳрат Ёқубжонович Аҳмедовга, 25 фоизи Исмоил Эркинович Исроиловга, қолган 25 фоизи эса Аброр Ахролович Ғаниевга тегишли.
Шуҳрат Аҳмедов «ZO‘R TV» телеканали, «Водий садоси» радиоканали, «Тасвир» нашриёт уйи раҳбари сифатида танилган (қайд этиш жоиз, «ZO‘R TV» эгаси ҳисобланган «Телерадиокомпания ZO‘R» компаниясининг ҳам 50 фоизи улуши Шуҳрат Аҳмедовга, 25 фоизи улуши Исмоил Исроиловга, қолган 25 фоизи эса Аброр Ғаниевга тегишли). Шуҳрат Аҳмедов 2018 йили Мустақиллик байрами арафасида «КолорПак» компанияси бош директори сифатида «Дўстлик» ордени билан мукофотланган.
Аброр Ғаниев 2019 йил мартида AKFA компаниялар гуруҳи директорлар кенгаши раиси этиб тайинланган. У 2019 йил сентябрида Akfa Engineering and Management компанияси раҳбари сифатида «Адолат» социал-демократик партияси Сиёсий кенгаши аъзоси этиб сайланган.
Исмоил Исроилов Сирдарё вилоятида 2020 йил май ойида кузатилган тошқиндан сўнг зарар кўрган ҳудудларда янги кўп қаватли уйлар қуриш ҳуқуқини қўлга киритган уч компаниядан бири — Whitecity Construction муассисларидан бири (улуши 40 фоиз). «Gazeta.uz» маълумотларига кўра, Исроиловнинг Durable Beton компаниясида ҳам улушга эга, шунингдек, Зокирхўжа Обидович Ортиқхўжаев билан бирга қоғоз маҳсулотлари ишлаб чиқаришга ихтисослашган Master Pack компаниясининг икки таъсисчисидан биридир.
Маълумот учун, Ғафур Ғулом номидаги нашриёт-матба ижодий уйи Ўзбекистон Ахборот ва оммавий коммуникациялар тизимидаги унитар корхона бўлиб, 100 фоиз Давлат активларини бошқариш агентлигига тегишли.
Дарсликларни чоп этиш механизми қандай?
Вазирлар Маҳкамасининг 2010 йил 28 октябрдаги «Товарлар (ишлар, хизматлар)га тартибга солинадиган нархлар (тарифлар)ни декларация қилиш (тасдиқлаш) ва белгилаш тартибини янада такомиллаштириш чора-тадбирлари тўғрисида»ги, 2018 йил 30 мартдаги «Товар бозорларида монополияга қарши тартибга солишни янада такомиллаштириш чора-тадбирлари тўғрисида»ги қарорларига мувофиқ, умумий ўрта таълим муассасаларига тегишли умумтаълим фанлари бўйича дарслик ва ўқув-методик мажмуаларни нашр этиш хизматлари (Халқ таълими вазирлигининг махсус тасдиқланадиган рўйхати бўйича) нархлари (тарифлари) давлат томонидан тартибга солинадиган ижтимоий аҳамиятли товарлар (хизматлар) ва уларнинг стратегик турлари рўйхатига киритилган.Шунга асосан, Халқ таълими вазирлигидан маълум қилишларича, дарсликлар уларни нашрга тайёрлаган ва ҳуқуқ эгаси бўлган нашриёт-матбаа корхоналари тақдим этган нарх калькуляциялари декларация қилинган ҳолда тўғридан-тўғри шартномалар асосида харид қилиниб келинмоқда.
Ўзбекистон Президентининг «Ноширлик ва матбаа соҳасини янада ривожлантиришга оид қўшимча чора-тадбирлар тўғрисида» 2020 йил 16 мартдаги қарорига асосан шундай тартиб ўрнатилганки, унга мувофиқ:
- ноширлик ва матбаа корхоналари, шу жумладан давлат буюртмасини бажарувчи корхоналар нархни шакллантириш сиёсатини бозор механизмлари асосида эркин шакллантиради;
- 2020 йил 1 сентябрдан бошлаб давлат буюртмаси асосида босма маҳсулотлар, шу жумладан, дарсликлар ва ўқув-методик мажмуаларни нашрга тайёрлаш ва чоп этиш, Ўзбекистон норезидентлари ҳам қатнашиши мумкин бўлган, давлат харидлари тўғрисидаги қонун ҳужжатларида белгиланган тартибда амалга оширилади.
Изоҳ (0)