Европа дори воситалари агентлиги (EМА) пневмония ташхиси қўйилган ва коронавирус аниқланган 12 ёшдан катта беморларни даволаш учун ишлатиладиган Veklury («Ремдесивир») дори воситаси савдоси учун шартли рухсат берилишини тавсия қилди. Бу ҳақда агентлик матбуот хизмати маълум қилган.
Таъкидланишича, «Ремдесивир» Европа Иттифоқида рухсат олиш учун тавсия қилинган коронавирусга қарши илк дори воситаси ҳисобланади.
Саводлар учун шартли рухсат бу — тиббий эҳтиёжларни қондирадиган дори-дармонларнинг эрта киришини осонлаштириш, хусусан, коронавирус пандемияси каби фавқулодда ҳолатларда фойда берадиган Европа иттифоқининг норматив механизмларидан бири. Бу турдаги рухсат EМА’га қайси дори воситасининг савдосига рухсат берилишини тавсия қилиш имконини беради. Бу дори воситасининг барча хусусиятлари маълум бўлмаса-да, оғир аҳволдаги беморларни даволашда қўллаш мумкин бўлади.
EМА’нинг маълум қилишича, «Ремдесивир»дан фойдаланишга чеклов ўрнатилган: ундан фақатгина стационар режимдаги тиббиёт муассасаларида фойдаланиш мумкин. Дори воситаси вена орқали организмга юборилади.
Эслатиб ўтамиз, май ойининг бошларида Япония ҳукумати коронавирусга чалинган беморларни даволашда Американинг вирусга қарши тажрибавий «Ремдесивир» препаратидан фойдаланишни маъқуллаган эди. Жаҳон соғлиқни сақлаш ташкилоти эса коронавирусга қарши учта вакцина синовларнинг сўнгги босқичида қатнашишини маълум қилган. Касаллик ўчоғи бўлган Хитой эса вакцина яратилса, уни бутун дунёга тарқатишга ваъда берган.
Изоҳ (0)