Ҳиндистоннинг шарқий ва шимолий қисмида яшин уриши оқибатида 107 киши ҳалок бўлди. Бу ҳақда The Times of India газетаси хабар берди.
Маълумотларга кўра, яшин оқибатида Бихар штатининг шарқида 83 киши, яна 24 киши шимолий Уттар-Прадеш штатида ҳалок бўлган. Қурбонларнинг аксарияти яшин чаққан вақтда далада ишлаётган бўлган. Фавқулодда хизматларнинг юқори хавф даражасидан огоҳлантиришига қарамай, одамлар ноқулай об-ҳаво шароитида ҳам ишлашни давом эттираверган.
Ҳиндистон бош вазири Нарендра Моди ўзининг Twitter’даги саҳифаси орқали ҳалок бўлганларнинг оиласига ҳамдардлик билдирган. Унинг сўзларига кўра, штатлар ҳукумати ҳалок бўлганларнинг оиласига моддий ёрдам кўрсатади.
2019 йилнинг июнида Бангладешда сутка давомида яшин уриши оқибатида 14 киши ҳалок бўлган эди.
Изоҳ (0)