«Барселона» ярим ҳимоячиси Артур тез орада «Ювентус» футболчисига айланади.
ESPN нашрининг хабар қилишича, томонлар ушбу ҳафта музокараларда катта силжишга эришган. Гарчи Артурга яқин манбалар ҳеч нарса ўзгармаганини таъкидлаган бўлса-да, «Ювентус» мазкур трансфернинг амалга ошишига ишонмоқда.
Қарама-қарши йўналишда туринликлар ярим ҳимоячиси Миралем Пьянич «Барселона»га ўтиши кутилмоқда. Клублар бу борада ҳам келишувга эришган. Бироқ трансферлар алоҳида келишув асосида расмийлаштирилади.
«Ювентус» бразилиялик футболчи учун 60 миллион евро тўлайди. Пьяничнинг нархи эса ундан бироз арзонроқ бўлади.
Артур Туринда «Барселона»дагига қараганда кўпроқ маош олади. Аввалроқ футболчининг маоши икки баробар ошиши мумкинлиги ҳақида хабарлар тарқалганди. Шунингдек, «Ювентус» Артур трансфери учун 80 миллион евро тўлаши ҳам айтилганди.
Эслатиб ўтамиз, Артур Мело 2018 йилда «Гремио»дан каталонлар сафига ўтган. Жамоа унинг трансферига 30 миллион евро сарфлаган. Жорий мавсум ярим ҳимоячи Ла Лигада 20 та ўйин ўтказиб, учтадан гол ва голли узатмага муаллиф бўлди.
Босниялик футболчи 2019/20 йилги мавсумда «Ювентус» сафида А Серияда 23 ўйинда учта гол урди ва тўртта голли узатма амалга оширди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)