Ўзбекистонда 2020 йилда мактаб, академик лицей ҳамда касб-ҳунар коллежларининг 16 ёшга тўлган битирувчилари фуқаролик паспортини 10 кун ичида навбатларсиз олиши мумкин. Бу ҳақда Олий ва ўрта махсус таълим вазирлиги маълум қилди.
Маълум қилинишича, Ўзбекистон Республикаси таълим муассасаларига ўқишга қабул қилиш бўйича Давлат комиссияси мажлисининг 2020 йил 1-сон баёнига кўра, Ички ишлар вазирлиги томонидан 2020/2021-ўқув йилида мактаб, академик лицей ҳамда касб-ҳунар коллежларининг 16 ёшга тўлган битирувчилари паспорт олиш учун мурожаат қилганда, уларга навбатларсиз, белгиланган тартибда паспорт берилиши таъминланади. Абитуриентга 10 кун муддатда паспорт берилиши кўзда тутилган.
Шунингдек, олий таълим муассасаларига ўқишга кириш учун имтиҳонларда иштирок этиш истагини билдирган паспорт ёшига етмаган фуқароларга амалдаги тартибга мувофиқ қисқа муддатларда хорижга чиқиш паспорти расмийлаштириб берилади.
Давлат персоналлаштириш маркази томонидан паспорт ёшига етмаган фуқароларга хорижга чиқиш паспортлари берилади ва мавжуд маълумотлар Ягона интерактив давлат хизматлари порталига ва Давлат тест марказига тақдим этилади. Хорижга чиқиш паспортини абитуриентга 5 кун муддатда бериш кўзда тутилган.
Изоҳ (0)