Шавкат Мирзиёев Ғалаба парадида иштирок этиш учун Москвага жўнаб кетди
Ўзбекистон Президенти Шавкат Мирзиёев Россия президенти Владимир Путиннинг таклифига биноан амалий ташриф билан Москвага жўнаб кетди. Бу ҳақда Президент матбуот хизмати хабар берди.
Маълум қилинишича, 23 июнь кунининг иккинчи ярмида олий даражада икки томонлама музокаралар ўтказилиши режалаштирилган. Ўзбекистон—Россия стратегик шериклик ва кўп қиррали ҳамкорлик муносабатларининг долзарб масалалари кўриб чиқилади.
24 июнь куни Шавкат Мирзиёев фашизм устидан қозонилган ғалабанинг 75 йиллигига бағишланган тантанали тадбирларда иштирок этади.
Шавкат Мирзиёевнинг Москвага бориши ҳақида аввалроқ маълум қилинганди. Шунингдек, мазкур парадда ўзбекистонлик ҳарбийлар ҳам иштирок этади.
Эслатиб ўтамиз, Владимир Путин коронавирус тарқалиши билан боғлиқ вазият сабаб 9 майда ўтиши лозим бўлган Ғалаба парадининг ўтказилишини кечиктирган, бироқ тадбирларнинг қайси санада ўтишига аниқлик киритмаганди. Кейинроқ Путин параднинг 24 июнь куни ўтказилишини маълум қилди.
Владимир Путин Москвада ўтадиган Ғалаба парадига барча МДҲ давлатлари раҳбарларини таклиф қилган. Озарбайжон президенти Илҳом Алиев, Арманистон бош вазири Никол Пашинян мамлакатларидаги эпидемиологик вазият туфайли, Туркманистон президент Гурбангули Бердимуҳамедов 29 июнда 63 ёш — Пайғамбар ёшига тўлиши сабаб тантанали тадбирларга бора олмаслигини эълон қилган. Қозоғистоннинг биринчи президенти Нурсултон Назарбоев эса коронавирус юқтириб олган ва у ҳам Москвага бормайди.
