Фарғона вилоятининг Сўх туманида умумий қиймати 91,7 миллиард сўм бўлган йирик лойиҳа — «Қайроқ» насос станциясининг қурилиши бошлаб юборилди. Бу ҳақда «Дарё» мухбири хабар берди.
Сўх туман ҳокимлиги ахборот хизмати раҳбари Анваржон Жўраевнинг маълум қилишича, асосан, қишлоқ хўжалиги ва боғдорчиликка ихтисослашган Сўх туманида ерларни ўзлаштириш ҳамда сув чиқариш энг катта муаммолардан бири ҳисобланади.
Қайд этилишича, тумандаги Ўзбекистон ва Қирғизистон чегарасида жойлашган Қайроқ мавзесида ҳам қишлоқ хўжалигида фойдаланиш мумкин бўлган 1 минг 448 гектар ер мавжуд бўлиб, мазкур жой фақат ёмғир суви билан суғорилади. Йил қурғоқчил, ёмғир кам ёғган вақтда ҳеч қандай ҳосил олиб бўлмайди.
1985 йилда лойиҳаси ишлаб чиқилган ва қурилиши тўхтатиб қўйилган «Қайроқ» насос станцияси ҳудудга сув чиқаришнинг ягона йўли ҳисобланади.
Мазкур насос станцияси майдони давлат чегарасидан 1600 метр узоқликда — «Қизилқиёқ» насос станциясининг Сўх дарёсидан сув олиш нуқтасида жойлашган. «Қайроқ» насос станцияси 2 кўтармали бўлиб, бир сонияда 1,25 метр куб сув олиш имкониятига эга бўлади.
Маълум қилинишича, тумандаги 4642 та хонадоннинг 481 гектар томорқа майдонини сув билан таъминлаш учун 13 дона тик суғориш қудуқларини қуриш ва 1 дона ички насос агрегатини реконструкция қилиш талаб этилади. Натижада қишлоқ хўжалиги экинлари экишга имконият яратилиши билан бирга 18 мингдан ортиқ аҳоли бандлигини таъминлашга эришилади.
Изоҳ (0)