Sardobadagi suv toshqini tufayli jabrlangan aholiga hozirga qadar qancha narsa tarqatilgani ma’lum qilindi

Bosh prokuratura Sardobadagi suv toshqini bo‘yicha nazorat tadbirlari davom ettirilayotgani, jabr ko‘rgan aholiga shu kungacha qancha narsa tarqatilgani to‘g‘risida ma’lumot berdi.

Ta’kidlanishicha, davlat rahbarining topshirig‘iga asosan bosh prokuror tomonidan ishchi guruhlar tuzilib, ularga 300 ga yaqin prokuratura xodimlari jalb etilgan. Prokuraturada tuzilgan ishchi guruhlar tomonidan evakuatsiya qilingan aholining holidan muntazam ravishda xabar olinib, kunlik mahsulotlarga bo‘lgan ehtiyoj o‘rganib chiqilishi natijasida evakuatsiya qilingan har bir fuqaroga birinchi galda kerak bo‘ladigan mahsulot turlari aniqlashtirib olinmoqda.

Ma’lumotlarga ko‘ra, yashash joylaridan boshqa hududlarga evakuatsiya qilingan aholini nooziq-ovqat mahsulotlariga bo‘lgan ehtiyojlarini ta’minlash maqsadida o‘tgan davr mobaynida omborxonalarga 3,1 million donadan ortiq shaxsiy himoya va gigiyena vositalari, yotoq va boshqa uy-ro‘zg‘or buyumlari kelib tushgan bo‘lsa, ulardan 2,743 millionga yaqini fuqarolarga tarqatilgan.

Shuningdek, 76 267 dona matras, ko‘rpa va yostiq, 134 133 dona sovun va kir yuvish vositalari, 83 594 dona shaxsiy gigiyena vositalari, 1,798 million dona kiyim-kechak, 570,7 ming dona tibbiy buyumlar, 522 ming dona boshqa buyumlar kelib tushgan.

Ta’kidlanishicha, 5-iyun kuniga qadar ushbu ehtiyojlar to‘liq bartaraf etilgan.

“Jizzax viloyati bo‘yicha 174 ta kir yuvish kukuni, 160 ta sovun, 176 ta shampun, 162 ta tish pastasi, 192 ta bir martalik soqol olish vositasi, 188 ta ayollar gigiyenik vositalari, 199 ta sochiq, 25 ta matras va ko‘rpa, Sirdaryo viloyati bo‘yicha 10 839 ta kir yuvish kukuni, 14 138 ta sovun, 7 442 ta shampun, 8 510 ta tish pastasi, 6 341 ta bir martalik soqol olish vositasi, 6 926 ta ayollar gigiyenik vositalari, 20 598 ta pampers, 10 821 ta sochiq, 18 205 ta kiyim-kechak, 11 968 ta oyoq kiyimi, 4 971 ta yostiq, 9 640 ta matras va ko‘rpa tarqatildi”, — deyiladi xabarda.

Shu kunga qadar omborxonalarga gumanitar yordam sifatida 16 ta turdagi 2998 tonnadan ortiq oziq-ovqat mahsulotlari kelib tushgan bo‘lib, ushbu mahsulotlar jabrlanganlarning ehtiyojlarini tezkor ravishda o‘rganish orqali manzilli yetkazib berilmoqda.

Bundan tashqari, hozirga qadar 59,6 tonna go‘sht va tayyor go‘sht mahsulotlari, 367,7 tonna un va 115,7 tonna makaron, 75,7 tonna shakar, 335,4 tonna guruch, 73,6 tonna o‘simlik yog‘i, 5,8 tonna sariyog‘, 335,1 tonna kartoshka, 235,1 tonna sabzi, 266,4 tonna piyoz, 62,7 ming dona non va 287,5 ming dona tuxum mahsulotlari aholiga yetkazib berilgan.

Eslatib o‘tamiz, 1-may kuni soat 05:55 da Sirdaryo viloyatida joylashgan Sardoba suv ombori to‘g‘onining 6-piket devorida suv chiqishi yuzaga kelgandi. Suv toshqini oqibatida 4435 ta xonadon talafot ko‘rgan. Ulardan 2390 tasi yaroqsiz holga kelgan, 2045 tasi esa ta’mirtalab holatda. Bosh prokuratura Sardoba falokati yuzasidan jinoyat ishi bo‘yicha 4 ta tergov versiyasini ko‘rib chiqmoqda. Hozirda suv ombori ishi bo‘yicha ikki kishi qamoqqa olingan. Sardoba tumani “Do‘stlik” mahallasida 37 ta 1480 xonadonli; Mirzaobod tumani “Haqiqat” mahallasida 20 ta 800 xonadonli va “Navbahor” mahallasida 9 ta 360 xonadonli ko‘p qavatli turar joy qurilish ishlari boshlangan.