21 июндан бошлаб Озарбайжоннинг саккизта йирик шаҳрида, жумладан, Бокуда ҳам икки ҳафталик қаттиқ карантин бошланди, деб хабар беради «ТАСС».
Таъкидланишича, ҳукумат мамлакатда коронавирус билан касалланганлар сони ортиб кетаётгани боис 21 июндан 5 июлга қадар пойтахтда ҳамда Ганжа, Сумгаит, Ленкоран, Евлах, Масалла, Жалилобод, шунингдек, Абшерон туманида карантин чоралари кучайтирилган. Мазкур ҳудудларнинг барчаси инфекцияга чалинганлар сони энг кўп қайд этилган биринчи кластерга киради.
Озарбайжон Вазирлар маҳкамасининг қарорига кўра, ушбу давр мобайнида озиқ-овқат дўконлари ва дорихоналардан ташқари йирик савдо марказлари яна ёпилади, кафе ва ресторанларга овқатни фақатгина етказиб беришга рухсат этилади. Музейлар, кўргазма заллар, сартарошхоналар ва гўзаллик салонлари ҳам ўз фаолиятини тўхтатади. Ушбу чекловлар мамлакатда март ойининг охирида жорий этилиб, май ойининг иккинчи ярмига келиб олиб ташланганди.
Янги чеклов қоидаларига кўра, қўшимча изоляция чоралари жорий этилади, ҳаракатлар чекланади. Карантин режимида ишлашга рухсат этилган давлат ва бюджет ташкилотлари, шунингдек, хусусий компания ходимларининг бир қисми масофадан туриб ишлашга ўтади.
Қолган фуқаролар учун 5 апрелдан 18 майга қадар амалга бўлган SMS-рухсат тизими қайта жорий этилади. Улар ўзи яшаётган жойни уч ҳолатда тарк этиши мумкин: тиббиёт ёрдамидан фойдаланиш, озиқ-овқат ёки дори воситаларини харид қилиш, шунингдек, банк ёки почтага бориш; тоза ҳавода айланиш ва яқин қариндошларининг дафн маросимида иштирок этиш учун. Бунинг учун махсус код ва шахсни тасдиқловчи маълумотларни тегишли рақамга SMS тарзида юбориш ва рухсат олиш керак бўлади. Таъкидланишича, шифокор қабулига бориш, харидларни амалга ошириш ва сайр қилиш икки соатдан ошмаслиги керак ва бунинг учун рухсат бир кунда бир маротаба берилади.
Сўнгги маълумотларга кўра, Озарбайжонда коронавирус билан касалланганлар сони 12 238 кишига етган. Ҳозирга қадар мамлакатда 6516 киши вирусдан соғайишга муваффақ бўлган, 148 бемор COVID-19 қурбонига айланган.
Изоҳ (0)