АҚШ президенти Дональд Трамп хорижлик ишчиларнинг визалари бўйича яқин вақт ичида чекловлар қўлланиши мумкинлигини тасдиқлади. Бу ҳақда Fox News телеканали хабар берган.
Аввалроқ CNBC телеканали АҚШ ҳукуматидаги манбаларига таяниб, Трамп администрацияси вақтинчалик ишчи визаларининг берилишини тўхтатишни кўриб чиқаётганини хабар қилганди. Телеканал хабарига кўра, бу борадаги фармон маданият ва илмий дастурлар доирасидаги иштирокчиларга янги виза бериш, жумладан, J-1’га тааллуқли бўлиши мумкин. У аввал берилган ушбу турдаги визаларга таъсир қилмайди. Айрим компанияларга эса бу борада истисно қилишга рухсат берилиши кўзда тутилган.
«Ўзимизда ҳам иш излаётганлар етарлича. Визалар борасидаги ҳужжат лойиҳасини эртага ёки индинга эълон қиламиз. Менимча, бу қарор АҚШдаги кўплаб одамларни хурсанд қилади. Бу энг тўғри йўл бўлиши мумкин», – деган Трамп Fox News’га берган интервьюсида.
Журналистларнинг тафсилотлар борасида берган саволига АҚШ етакчиси америкаликларнинг мазкур ҳужжатнинг қабул қилинишидан мамнун бўлишини айтиш билан чекланган.Аввал апрель ойида Трампнинг АҚШга ишчи визаси билан боришни тақиқламоқчи экани, аввалдан мамлакатда мазкур виза билан ишлаганлар ўз ўрнига муносиблигини исботлаши лозимлиги хабар қилинганди.
Бундан ташқари, апрель охирида Трамп коронавирус пандемияси шароитида иш ўринларининг танқислиги туфайли АҚШга хориждан иммиграцияни вақтинчалик тўхтатиш ҳақида фармонни имзолаган. АҚШ президентининг айтишича мазкур чеклов Green Card ютишни мақсад қилганларга тааллуқли. Трамп иммиграцияни икки ойга вақтинча тўхтатиши, муддат тугагач фармон узайтирилиши ёки тақиқ бекор қилиниши айтилганди.
Изоҳ (0)