Yoshlar ittifoqining Qashqadaryo viloyat kengashi raisi Dilshod Usmonov ittifoqchilar son jihatidan ko‘p tadbir o‘tkazayotganini, ammo tadbirlar sifati va natijasi qoniqarsiz bo‘layotganini tan oldi, deya xabar berdi “Daryo” muxbiri.
Ta’kidlanishicha, 20-iyun kuni Qashqadaryo viloyatining Dehqonobod tumanida “Yoshlar oyligi” doirasida viloyat hokimi o‘rinbosari Rustam Yo‘ldoshev hamda Yoshlar ittifoqi viloyat kengashi mas’ullari ishtirokida matbuot anjumani tashkil etilgan.
Anjumanda so‘z olgan ittifoq mas’uli Ulug‘bek Sultonov viloyatda yoshlar faolligini oshirish maqsadida ko‘plab tadbirlar o‘tkazilayotganini, Prezident tomonidan ilgari surilgan beshta tashabbus doirasida kitobxonlik targ‘iboti bo‘yicha 77 marotaba onlayn tanlov o‘tkazish orqali 7345 nafar yosh qamrab olinganini aytib o‘tdi.
Shuningdek, “Yoshlar oyligi” doirasida “Hokim va yoshlar” onlayn uchrashuvi olti marotaba o‘tkazilganini, uchrashuvda ishtirok etgan 232 nafar o‘g‘il-qiz tomonidan ko‘tarilgan 47 ta muammoning 30 tasi joyida hal etilganini qo‘shimcha qildi.
Mas’ulga ko‘ra, “Yoshlar oyligi” doirasida “Senator va yoshlar”, hokim, prokuror, sektor rahbarlari va yoshlar deb nomlangan son jihatidan katta raqamlarni ko‘rsatuvchi uchrashuvlar orqali yuzlab yoshlar qamrab olingan.
Anjumanda so‘z olgan “Daryo” muxbiri son jihatidan katta raqamlarni ko‘rsatuvchi uchrashuvlar va yuzlab yoshlar jalb qilingan tadbirlar natijasi bilan qiziqdi.
Savolga javob bergan Yoshlar ittifoqi viloyat kengashi raisi Dilshod Usmonov katta raqamlar ortidagi uchrashuvlar va yuzlab yoshlar jalb qilingan tadbirlar sifati va natijasi o‘zini ham qoniqtirmasligini tan oldi.
“To‘g‘ri, son jihatidan ko‘p bo‘lgan tadbirlarimiz sifati va natijasi bizni ham qoniqtirmaydi”, — dedi Dilshod Usmonov.
Eslatib o‘tamiz, Ichki ishlar vazirligi TATU talabalari, Yoshlar ittifoqi va yosh volontyorlar orasida “Vatanparvar blogerlar” guruhini tuzishni taklif qilib, Prezident qarori loyihasini jamoatchilik muhokamasiga qo‘ygandi. Yoshlar ittifoqi markaziy kengashi raisi Alisher Sa’dullayev tashkilotning ushbu loyihaning ishlab chiqilishiga aloqasi yo‘qligini bildirib, qarordagi banddan Yoshlar ittifoqini olib tashlashni so‘ragan edi.
Izoh (0)