«Дарё»га Жомбой туманидаги 43-мактаб директорининг ўқув ишлари бўйича собиқ ўринбосари Гулноз Сафарова томонидан мурожаат келиб тушди. Мурожаатчининг айтишича, у 2018 йилнинг ноябрь ойида мактаб директорига ўринбосар бўлиб боргач, директор вазифасини бажарувчи Дилфуза Ашурова ҳамда мактаб ҳисобчисининг ҳужжатларда қайд этилган, аммо мактабга келмайдиган ўқитувчиларга ойлик маош ва мукофот бериши қонунга зидлигини билдирган ва шу сабаб ишдан бўшатилган.
Мазкур ариза юзасидан «Дарё» мухбири Фарҳод Норбўтаев журналистик суриштирув олиб борди.
«Тўрт нафар фарзандим бор. Турмуш ўртоғим ногирон — Черноблда бўлган. Ҳеч қандай нафақа олмайди. Ўзим Самарқанд давлат университетининг тарих факультетини тугатганман. 28 йилдан буён тарих фани ўқитувчиси бўлиб ишлайман, — дейди Гулноз Сафарова. — 43-мактабга директор ўринбосари бўлиб келганимдан сўнг иш жараёнида ўқитувчилар рўйхати билан танишдим. Беш нафар ўқитувчининг фамилияси бор, аммо ўзи йўқ. Мен бу ўқитувчиларни туман халқ таълими бўлимига бориб тариф ва табелдан ўчиртирдим. Менинг бу ишим мактаб директори Д.Ашурова ва ҳисобчига ёқмади. Шундан сўнг ҳисобчи мен олиб борган маош табелини қабул қилмай, ўзимга қайтариб отадиган бўлди.
Гулноз Сафарова томонидан «Дарё»га тақдим этилган аудио ва видеоматериалларига кўра, 2019 йилнинг декабрь ойида мактаб директори ўқитувчиларни йиғиб, текширишга келган комиссия учун пул йиғиб бериши лозимлигини маълум қилган. Директор ўқитувчиларга Жомбой туманида 56 та мактаб борлигини, мактабларнинг катта-кичиклигига қараб қанчадан пул йиғиб бериш белгилаб берилганини айтган.
«Директор комиссия учун пул йиғиб беришини, кимга қанчадан тушганлигини айтди. Ўқитувчилар эса бермаймиз, деб директорга қарши чиқишди. Директор ва ўқитувчилар ўртасидаги жанжалда ҳақоратли сўзлар айтилди, — дейди Гулноз Сафарова. — Комиссияга берилиши керак бўлган пулни ўқитувчилар уйидан олиб келиб йиғиб беришди».
Таъкидланишича, 43-мактаб Жомбой туман марказидан 10 километр узоқликда жойлашган бўлиб, туманнинг ўша вақтдаги ҳокими Умид Назаровнинг тавсиясига кўра ҳоким секторига қарашли бўлган мактабни тартибга солиш учун Гулноз Сафарова директор ўринбосари этиб тайинланган.
«Туман ҳокими мактабни тартибга солиб беришим учун юборганди. Мактабни зўрға тартибга солгандим. Ўқитувчилар, асосан, ойликдан кун кўради. Шу сабабли пул йиғишга қарши бўлгандим, ўқувчилардан ҳам пул йиғгани қўймасдим. Шунга мени ишдан четлатишди. 12 та гуруҳга онлайн дарс ўтаётган эдим. Пандемия пайтида мени сабабсиз ишдан олишди», — дейди Гулноз Сафарова.
«Дарё»га тақдим этилган аудиоёзувларда мактаб директори ўқитувчилардан пул йиғишга уринганини эшитиш мумкин.
https://youtu.be/brn38oku7ok
«Ҳар бир ўқитувчига ўзим ҳисоблаб чиқдим. Ўзим ишчи гуруҳ тузаман. Ишчи гуруҳ пулни йиғади. Бир ставка қоровул, ярим ставка фаррош штати очганман. Шунинг учун молиядан қарз бўлиб турибман. Уларнинг пулини мактабнинг ‘оформлениеъси учун бериб юборганман, яширмайман. Мана ҳозир Ҳайдар ака телефон қиляпти пулни етказ, деб. Директор пулни устида турмайди-ку», — дейди Дилфуза Ашурова.
Аудиоёзувда, шунингдек, «Мана шу мактаб бўлмаса, сизлар қаердан маош оласизлар. Ҳамма мактабдан Ҳисоб палатасига пул йиғган. Неча пулдан йиғганини хоҳлаган мактабингизга телефон қилиб сўранг. Барибир еганмиз, ичганмиз. Еган оғиз уялар, деган гап бор. Соат 16:00 гача пулни олиб боришим керак. Бошқа мактаблар аллақачон олиб бориб берган. Менинг бўйнимга қолмаслиги учун холисона йиғасизлар. Пулни шу ердаги 40 та ходимга бўласизлар. Ўзим ҳисоблаб кўрдим. Ҳисоб палатасига 40 минг сўмдан тушяпти, 20 минг сўмдан мактабнинг ‘оформлениеъсига. Менга 60 минг сўмдан тўлайсизлар. Мен соат 16:00 гача жой-жойига бериб келаман. Ҳайдар акани шу ерга чақираман, бериб юборасизлар. Ҳисоб палатасиники мен олиб бориб бераман. Қисқаси, соат 16:00 гача вақт бор», деган гаплар бор.
Мактаб директори ўқитувчилар билан суҳбатида 40 минг сўмлик тўловни мактаб қоровули ва фарроши ҳам бераётганини айтиб, қайси ўқитувчи мазкур ҳолатга қарши чиқса, ишдан бўшашини айтган.
«Ўқиб бер, десаларингиз ўқиб бераман. Шунинг учун ҳамма ўзича тасаввур қилсин. Мен умумий харажатни 40 минг сўмдан дедим. Мана бечора қоровул ҳам беради ўша 40 минг сўмни. 200 минг оладиган фаррош ҳам. Битта ўқитувчи 800 минг сўм устама олади. Энг кам ойлик бир ярим миллион сўм. Мен Аслиддин билан ҳисоблаб чиқдим. Шунинг учун индамай менинг қўлимга етказинг. Тўлаб тинчгина ухлай, Ҳайдар ака мени безовта қилмасин. Молия штатингни оч, деб мени безовта қилмасин. Ҳисоб палатаси ишини тугатгунча бериб келай. Агар тўламайман, ишламайман, дейдиганлар бўлса аризани ёзсин-да, ишдан бўшасин. Чарчадим мен. Шартномани бекор қилиб юбораман. Ишлаганимга икки йил бўлган бўлса, харажатдан чарчадим»,— дейди мактаб директори.
Мактаб директори «ревизия»га харажат қилганини, бу ишда унга Даврон исмли шахс ёрдам берганини, текширувни ёпиш учун бошқа мактаб директорларига ўхшаб штат ёздириб олмаётганини таъкидлайди.
43-мактаб директори Дилфуза Ашурованинг аудиода айтган гаплари асосида журналистик суриштирув ўтказган «Дарё» мухбирининг аниқлаштиришича, Жомбой туманидаги бошқа мактаб директорлари томонидан Ҳисоб палатаси учун ўқитувчилардан ҳеч қандай пул йиғилмаган.
Вилоят халқ таълими бошқармаси ахборот хизматининг маълум қилишича, аудиоёзувда 43-мактаб директори Дилфуза Ашурованинг мактаб ўқитувчилари иштирокида ўтказилган йиғилишида турли сабабларга кўра ўқитувчилардан 60 минг сўмдан пул талаб қилгани, талаб бажарилмаса, меҳнат шартномасини бекор қилиш ва ишдан ҳайдаш билан таҳдид қилгани, видеода эса Дилфуза Ашурова ҳамда ўқитувчилар ўртасида келиб чиққан ўзаро тортишув ҳолати акс этган.
«43-мактаб директори Дилфуза Ашурова мактабда молиявий текшириш ўтказилгач, аниқланган камомадни ўқитувчилар ўртасида тақсимлаган ҳолда бартараф қилишни мақсад қилган, бироқ бу ўқитувчилар ўртасида норозиликни келтириб чиқарган ва жанжалга айланган. Д.Ашурованинг қайд этишича, ўқитувчилар унинг талабини бажармагач, камомадни ўз ойлигидан тўлашга мажбур бўлган, — дейди вилоят ХТБ ахборот хизмати раҳбари Абдуҳошим Зиятов. — Ўрганиш жараёнида Д.Ашурова томонидан йўл қўйилган хато-камчиликлар ўз тасдиғини топгач, у билан тузилган меҳнат шартномаси бекор қилиниб, лавозимидан озод этилди».
Вилоят ХТБ ахборот хизмати раҳбарининг таъкидлашича, ноҳақ ишдан бўшатилгани учун шикоят қилган 43-мактаб директорининг ўқув ишлари бўйича собиқ ўринбосари Гулноз Сафарова ўз хоҳишига кўра Жомбой туманидаги 37-умумтаълим мактаби директорининг маънавий-маърифий ишлар бўйича ўринбосари вазифасига тайинланган.
Аммо Самарқанд вилоят халқ таълими бошқармаси ахборот хизмати Гулноз Сафарованинг тушунтириш хати, шунингдек, аризасида келтирилган бошқа важлар юзасидан ҳеч қандай маълумот тақдим этмади.
Ҳолат юзасидан олиб борилган журналистик суриштирув давомида республика Ҳисоб палатаси ахборот хизмати билан боғланиб, Жомбой туманида Ҳисоб палатаси ходимларининг текширувини ёпиш учун йиғилган пуллар масаласига муносабат сўрадик.
«Ҳисоб палатаси фаолияти бўйича берилган ҳар қандай хабарларга жиддий ёндашади. Ушбу аудиоёзув чиққан саналарда Ҳисоб палатаси Самарқанд вилояти Жомбой туманида текширув ўтказмаган. Шуни эътиборга олиб, Ҳисоб палатаси ушбу аудиоёзувни тегишли ҳуқуқ-тартибот идораларига юборди. Якуни бўйича «Дарё»га хабар берилади. Шунингдек, кимда Ҳисоб палатаси ходимларига нисбатан ариза, шикоят бўлса ёки Ҳисоб палатаси ходимлари томонидан моддий ёки номоддий талаблар қўйилган бўлса, +998712390130 рақамига мурожаат қилишларини сўраймиз», — дейилади Ҳисоб палатаси ахборот хизмати маълумотида.
Изоҳ (0)